قومی ٹی 20 اسکواڈ ایشیا کپ اور سہ ملکی سیریز کے لیے دبئی پہنچ گیا ہے۔
پاکستان کرکٹ بورڈ کے مطابق ٹیم بدھ کو 4 مختلف گروپوں کی صورت میں دبئی پہنچی تاکہ کھلاڑیوں اور آفیشلز کی آمد کو منظم بنایا جاسکے۔
یہ بھی پڑھیں: 3 ملکی سیریز اور ایشیا کپ کے لیے قومی ٹیم کی سیلیکشن پر سابق کھلاڑیوں کی کیا رائے ہے؟
پی سی بی نے اپنے بیان میں بتایا کہ کھلاڑی 21 اگست سے 27 اگست تک دبئی میں پری سیریز ٹریننگ کیمپ میں حصہ لیں گے جبکہ جمعرات کو آئی سی سی کرکٹ اکیڈمی میں پہلا ٹریننگ سیشن شیڈول ہے۔ آئی سی سی کرکٹ اکیڈمی کو ٹیم کا بنیادی ٹریننگ وینیو مقرر کیا گیا ہے، اس کے ساتھ ساتھ دبئی انٹرنیشنل کرکٹ اسٹیڈیم میں ایک پریکٹس میچ بھی کھیلا جائے گا۔
سہ ملکی سیریز میں افغانستان اور متحدہ عرب امارات کی ٹیمیں شامل ہیں جو 29 اگست سے دبئی میں شروع ہو گی، اس کے بعد 9 ستمبر سے ایشیا کپ کا آغاز ہو گا جس کے تمام میچز بھی متحدہ عرب امارات میں ہی ہوں گے۔
سہہ ملکی سیریز اور ایشیا کپ
پاکستان ٹی ٹونٹی اسکواڈ دبئی پہنچ گیا
پاکستان ٹیم 4 گروپس میں دبئی پہنچی
پاکستان ٹیم 21 سے 27 اگست تک پری سیریز ٹریننگ کیمپ میں حصہ لے گی
کل پاکستان ٹیم آئی سی سی اکیڈمی میں ٹریننگ سیشن میں حصہ لے گی pic.twitter.com/czQmbLnWIB
— PCB Media (@TheRealPCBMedia) August 20, 2025
یہ بھی پڑھیں: دوسرے ٹیسٹ کے لیے قومی اسکواڈ کا اعلان، بابر، شاہین اور نسیم آؤٹ
قومی ٹیم کے اسکواڈ میں اس بار نمایاں تبدیلیاں کی گئی ہیں، جن میں سابق کپتان بابراعظم اور وکٹ کیپر بلے باز محمد رضوان شامل نہیں ہیں۔ کوچ مائیک ہیسن نے اس فیصلے کی وضاحت کرتے ہوئے کہا کہ دونوں کھلاڑی دسمبر کے بعد سے نہیں کھیلے جبکہ دیگر کھلاڑی بہتر کارکردگی کا مظاہرہ کررہے ہیں۔
یاد رہے کہ مائیک ہیسن نے مئی میں کوچنگ کا عہدہ سنبھالا تھا، جس کے بعد پاکستان نے 3 ٹی 20 سیریز کھیلی ہیں۔ ٹیم نے ہوم گراؤنڈ پر 3-0 سے کامیابی حاصل کی، بنگلہ دیش کے خلاف ایوے سیریز 2-1 سے ہاری جبکہ امریکا میں ویسٹ انڈیز کے خلاف 2-1 سے کامیابی حاصل کی۔
یہ بھی پڑھیں: ایشیا کپ 2025: بھارت نے مضبوط اسکواڈ کا اعلان کردیا، بڑے ناموں کی واپسی
اس بار اسکواڈ کی قیادت آل راؤنڈر سلمان آغا کریں گے۔ اسکواڈ میں فاسٹ بولرز محمد وسیم اور سلمان مرزا کی واپسی ہوئی ہے۔
پاکستانی اسکواڈ میں سلمان آغا (کپتان)، صائم ایوب، فخر زمان، صاحبزادہ فرحان، حسن نواز، سلمان مرزا، محمد حارث، محمد نواز، شاہین شاہ آفریدی، حارث رؤف، حسن علی، حسین طلعت، صوفیان مقیم، ابرار احمد، خوشدل شاہ، فہیم اشرف اور محمد وسیم شامل کھلاڑی ہیں۔
