پاکستان اور چین کے وزرائے خارجہ نے خطے کے امن، استحکام اور خوشحالی کے لیے مل کر کام کرنے کا عزم ظاہر کیا ہے۔
پاکستان کے نائب وزیراعظم و وزیرخارجہ اسحاق ڈار اور چین کے وزیر خارجہ وانگ ژی نے مشترکہ نیوز کانفرنس میں خطاب کرتے ہوئے اسحاق ڈار نے کہا کہ وہ چین کے وزیر خارجہ کا پاکستان میں خیر مقدم کرتے ہیں۔ چین اور پاکستان آہنی برادر ملک ہیں۔ پاک چین تعلقات کے فروغ کے لیے وزیر خارجہ وانگ ژی کلیدی کردار ادا کر رہے ہیں۔ ان کے ساتھ مفید بات چیت ہوئی ہے۔ ملاقات میں باہمی دلچسپی کے امور پر بات چیت کی گئی۔ سی پیک سمیت پاک چین تعلقات کے تمام پہلوؤں کا جائزہ لیا گیا۔ تمام اہم امور پر اتفاق رائے موجود ہے۔
انہوں نے کہا کہ چین کو پاکستان کی خارجہ پالیسی میں کلیدی حیثیت حاصل ہے۔ پاکستان اور چین خطے کے امن، استحکام اور خوشحالی کے لیے مل کر کام کرنے کے لیے پرعزم ہیں۔ پاکستان اور چین کی دوستی مضبوط بنیادوں پر قائم ہے۔ پاکستان کی سالمیت اور علاقائی خودمختاری کے تحفظ کے لیے چین کے عزم کو سراہتے ہیں۔
اسحاق ڈار نے کہا کہ چین کو پاکستان کی خارجہ پالیسی میں کلیدی حیثیت حاصل ہے اور پاکستان چین کے ساتھ تجارت کو مزید وسعت دینے کا خواہاں ہے۔ دونوں ملک سی پیک فیز 2، عوامی سطح پر روابط سمیت دو طرفہ تعاون کو مزید وسعت دینے کے لیے پرعزم ہیں۔ اور اس عزم کا اظہار بھی کرتے ہیں کہ دونوں ملک سلامتی کونسل سمیت مختلف عالمی فورمز پر ایک دوسرے کی حمایت جاری رکھیں گے۔
انہوں نے کہا کہ ہم نے وزیراعظم شہباز شریف کے دورہ چین کے حوالے سے بھی گفتگو کی۔ پاکستان اور چین اگلے سال اپنی دوستی کے تعلقات کی 75ویں سالگرہ منائیں گے۔
چینی وزیر خارجہ وانگ ژی کا خطاب
چینی وزیر خارجہ وانگ ژی نے کہا کہ وہ شاندار میزبانی پر پاکستان کے شکر گزار ہیں۔ پاکستان اور چین کے درمیان دوستانہ اور برادرانہ تعلقات ہیں۔ چین پاکستان کو اپنا قابل اعتماد اتحادی تصور کرتا ہے۔ آج دونوں ملکوں کے درمیان مختلف امور پر تفصیلی گفتگو ہوئی۔ ملاقات میں سی پیک فیز 2 پر بھی تفصیلی گفتگو ہوئی۔ انسداد دہشتگردی کے شعبے اور صنعت، زراعت، مائننگ کے میدان میں میں تعاون مزید بڑھائیں گے۔ پاکستان اور چین کے درمیان تزویراتی شراکت داری مضبوط ہورہی ہے۔ دونوں ملکوں کے درمیان اعتماد اور محبت کا رشتہ بھی مزید مضبوط ہورہا ہے۔
انہوں نے کہا کہ پاکستان کے ساتھ تعلقات کو نئی بلندیوں پر لے جا رہے ہیں۔علاقائی امن و استحکام ہمارا مشترکہ ہدف ہے۔ ہم وزیراعظم محمد شہباز شریف کے دورہ چین کے منتظر ہیں۔
