پاکستان میں پیٹرولیم مصنوعات کی قیمتوں میں اضافہ متوقع ہے جس کی بنیادی وجہ عالمی منڈی میں خام تیل کی قیمتوں میں حالیہ اضافہ بتایا جا رہا ہے۔
یہ بھی پڑھیں:پیٹرول اور ڈیزل اسمگل کرنے والوں کے خلاف کیا کارروائی ہو گی؟
گزشتہ 13 روز کے دوران برطانوی برینٹ خام تیل کی قیمت فی بیرل 65.85 ڈالر سے بڑھ کر 67.47 ڈالر تک جا پہنچی، یعنی ایک ڈالر 60 سینٹ کا اضافہ ریکارڈ کیا گیا۔
اسی عرصے میں امریکی خام تیل بھی مہنگا ہوا اور فی بیرل 61.98 ڈالر سے بڑھ کر 63.62 ڈالر تک جا پہنچا، جو کہ ایک ڈالر 64 سینٹ کا اضافہ بنتا ہے۔
اوگرا (آئل اینڈ گیس ریگولیٹری اتھارٹی) 31 اگست کو پیٹرولیم مصنوعات کی نئی قیمتوں کا تعین کرنے کے لیے سمری حکومت کو بھیجے گا۔
وزیر اعظم شہباز شریف کی منظوری کے بعد وزارت خزانہ باضابطہ نوٹیفکیشن جاری کرے گی۔
ماہرین کا کہنا ہے کہ عالمی منڈی کے زیر اثر پاکستان میں پیٹرولیم مصنوعات کی قیمتیں بڑھنے کا امکان ہے اور یہ عوامی سطح پر مہنگائی کے دباؤ میں مزید اضافہ کرے گا۔
