پاکستان کرکٹ بورڈ (پی سی بی) نے حنیف محمد ٹرافی کے تیسرے راؤنڈ کا شیڈول بارشوں کی پیشگوئی کے باعث تبدیل کر دیا ہے۔
پی سی بی کے مطابق تیسرے راؤنڈ کے میچز بدھ 10 ستمبر کے بجائے اب جمعرات 11 ستمبر سے شروع ہوں گے۔ یہ فیصلہ بہاولپور، کراچی، ملتان اور رحیم یار خان میں بارش کے امکانات کے باعث کیا گیا ہے۔
یہ بھی پڑھیں: ملک میں ڈومیسٹک کرکٹ کی بہار کا آغاز 15 اگست سے ہوگا، کیلنڈر جاری
پی سی بی کے اعلامیے میں کہا گیا کہ تیسرے راؤنڈ کے چھ میچز اب نئے شیڈول کے تحت کھیلے جائیں گے۔
گروپ اے کے میچز میں حیدرآباد کا مقابلہ کوئٹہ سے عباسیہ اسپورٹس کمپلیکس رحیم یار خان میں ہوگا، لاہور بلووز اور آزاد جموں و کشمیر کی ٹیمیں بہاولپور کے ڈرنگ اسٹیڈیم میں مدمقابل ہوں گی جبکہ ملتان کرکٹ اسٹیڈیم میں فیصل آباد اور کراچی وائٹس آمنے سامنے آئیں گے۔
یہ بھی پڑھیں: فرسٹ کلاس کرکٹ رونق 26 اکتوبر سے شروع ہوگی، قائداعظم ٹرافی کے شیڈول کا اعلان
گروپ بی کے میچز کراچی کے مختلف گراؤنڈز میں شیڈول کیے گئے ہیں۔ نیشنل بینک اسٹیڈیم پر کراچی بلووز کا مقابلہ ڈیرہ مراد جمالی سے ہوگا، ایس بی پی اسپورٹس کمپلیکس میں فاٹا اور لاڑکانہ کے درمیان میچ کھیلا جائے گا جبکہ یو بی ایل اسپورٹس کمپلیکس میں راولپنڈی اور ملتان کی ٹیمیں میدان میں اتریں گی۔
پی سی بی کے مطابق یہ فیصلہ کھلاڑیوں اور آفیشلز کی حفاظت کو مدنظر رکھتے ہوئے کیا گیا ہے تاکہ میچز متاثر نہ ہوں اور ایونٹ کے دوران بہترین کھیل یقینی بنایا جا سکے۔
