کراچی انڈسٹریل ایریا میں موجود گارمنٹس کی فیکٹری آگ لگنے سے زمین ہوگئی ہے، آگ کی شدت کے باعث قریب موجود فیکٹریوں میں کام روک دیا گیا اور خالی کرادیا گیا۔
واقعے کے بعد ریسکیو اور آگ بجھانے کی سرگرمیاں جاری ہیں جبکہ 5 زخمیوں کو عمارت کے ملبے سے نکالا گیا ہے، ریسکیو حکام کے مطابق فیکٹری کے اطراف میں موجود 2 اور عمارتیں بھی آتشزدگی کی زد میں ہیں جن میں ایک دھاگا بنانے والی فیکٹری بھی شامل ہے۔
یہ بھی پڑھیے: کراچی: کورنگی میں ہونے والی خوفناک آتشزدگی کی وجوہات سامنے آگئیں
فیکٹری کی عمارت میں آتشزدگی کے بعد ریسکیو کارروائیاں جاری تھیں کہ عمارت اچانک دھماکے سے گر گئی۔ عمارت گرنے پر وہاں موجود ریسکیو اہلکاروں اور میڈیا نمائندوں نے بھاگ کر جان بچائی اور بھگدڑ مچ گئی۔
حکام کے مطابق فیکٹری میں موجود کیمیکلز کی وجہ سے آگ بجھانے میں مشکل آرہی ہے، فیکٹری میں کسی کے پھنسنے کی اطلاعات نہیں ہیں تاہم اربن سرچ اینڈ ریسکیو کی ٹیم وقوعے پر پہنچ چکی ہے اور ریسکیو1122 کے ساتھ امدادی کارروائیوں میں مصروف ہے۔
فائر بریگیڈ حکام کے مطابق آگ فیکٹری کی بیسمنٹ میں لگی تھی جس کی شدت زیادہ تھی، بیسمنٹ میں لگنے والی آگ نے پہلی منزل کو بھی لپیٹ میں لے لیا تھا، چار منزلہ گارمنٹ فیکٹری کی عمارت کمزور تھی، فیکٹری کے اندر 200 سے زائد لوگ موجود تھے جنہیں باہر نکال لیا گیا ہے۔
یہ بھی پڑھیے: لاس اینجلس آتشزدگی: ہلاکتوں میں اضافہ، اگلے ہفتے مزید تباہی کی پیش گوئی
ایم ایس عباسی شہید اسپتال کے مطابق نیوکراچی انڈسٹریل ایریا فیکٹری میں آتشزدگی کا واقعہ میں جھلس کر زخمی ہونے والے 8 فائرفائٹرز کو عباسی شہید اسپتال لایا گیا تھا، شدید زخمی 4 فائرفائٹرز سول ٹراما سینٹر اور 2 کو گلشن اقبال کے نجی اسپتال منتقل کیا گیا ہے۔
