وزارت داخلہ کے مطابق پیکا ایکٹ کے تحت ملک بھر میں اب تک مجموعی طور پر 372 مقدمات درج کیے گئے ہیں، پنجاب میں سب سے زیادہ 268، جبکہ بلوچستان میں سب سے کم 7 مقدمات رجسٹرڈ کیے گئے، این سی سی آئی اے نے مجموعی طور پر 1214 مقدمات درج کیے جس کی زد میں 10 صحافی بھی آگئے ہیں۔ اس قانون کے تحت درج مقدمات میں صحافیوں کی تعداد بہت کم ہے۔
یہ بھی پڑھیں: نازیبا ویڈیوز کی تشہیر پر کریک ڈاؤن، لاہور میں پیکا ایکٹ کے تحت 23 مقدمات درج
سینیٹ کی قائمہ کمیٹی برائے اطلاعات و نشریات کے اجلاس میں حکام وزارت داخلہ نے بتایا کہ پیکا ایکٹ کے تحت پنجاب میں 268، خیبرپختونخوا میں 47، سندھ میں 21، اسلام آباد میں 19، آزاد کشمیر میں 10، بلوچستان میں 7 جبکہ گلگت بلتستان میں کوئی بھی مقدمہ پیکا ایکٹ کے تحت درج نہیں کیا گیا ہے، اس کے علاوہ یہ بھی بتایا گیا کہ صوبے اب پیکا ایکٹ کے تحت مقدمہ رجسٹرڈ نہیں کر سکتے۔
اب تک جن صحافیوں کے خلاف پیکا ایکٹ کے تحت مقدمات درج ہوئے ان میں عادل راجا، عمران ریاض، شہزاد رفیق، احمد نورانی، صابر شاکر، معید حسن پیرزادہ، احمد نورانی، فرحان گوہر، ملک خالد جمیل اور محمد وحید شامل ہیں۔
الیکٹرانک اور پرنٹ میڈیا پیکا قانون کے انڈر نہیں آتے۔ پیکا صرف سوشل میڈیا پر فیک نیوز کو کنٹرول کرنے کیلیے ہے۔ اس کیخلاف شور وہ لوگ مچا رہے ہیں جو فیک نیوز اور جھوٹ پھیلا کر ڈالر کما رہے ہیں۔ pic.twitter.com/EoYvyakhWS
— عوام بنام سرکار (@lawliga) January 31, 2025
حکام وزارت داخلہ نے بتایا کہ اسلام آباد میں پیکا ایکٹ کے تحت درج کی گئی 19 ایف آئی آرز میں سے 9 ایف آئی آر پیکا ترامیم سے پہلے درج ہوئی ہیں اور 10 پیکا ایکٹ کے بعد درج ہو چکی ہیں، ان مقدمات میں کوئی بھی مقدمہ کسی صحافی کے خلاف نہیں ہے، جبکہ 19 مقدمات میں کوئی ایک بھی ملزم گرفتار نہیں۔
ڈائریکٹر جنرل نیشنل سائبر کرائم انویسٹی گیشن ایجنسی نے بتایا کہ پاکستان میں این سی سی آئی اے کے مجموعی طور پر 15 دفاتر ہیں، اب تک کل 1214 مقدمات درج کیے گئے ہیں جن میں 10 صحافی اور 1204 دیگر عام لوگ شامل ہیں۔
یہ بھی پڑھیں: پیکا ایکٹ میں مزید ترمیم کا بل قومی اسمبلی میں پیش، فیک نیوز پر 5 سال کی سزا ہوگی
انہوں نے بتایا کہ ان مقدمات میں سے 611 مقدمات مالی فراڈ کیسز کے ہیں، ہراسگی کے 320، نفرت انگیز تقاریر کے 174 مقدمات جبکہ غیر قانونی سمز رکھنے کے 19 مقدمات شامل ہیں۔
