وزیراعظم محمد شہباز شریف ایک روزہ سرکاری دورے پر قطر کے دارالحکومت دوحہ روانہ ہوگئے۔
وزیراعظم 15 ستمبر کو دوحہ میں منعقد ہونے والی ہنگامی عرب اسلامی سربراہی کانفرنس میں شرکت کریں گے۔
یہ اجلاس اسرائیل کے دوحہ پر فضائی حملوں اور فلسطین میں انسانی حقوق کی مسلسل خلاف ورزیوں کے پس منظر میں طلب کیا گیا ہے۔ اجلاس میں او آئی سی کے رکن ممالک کے سربراہان اور اعلیٰ حکام کی بڑی تعداد شریک ہوگی۔
یہ بھی پڑھیے: قطر: وزیر خارجہ اسحاق ڈار کی ترک ہم منصب سے ملاقات، دوحہ میں اسرائیلی حملے کی مذمت
وزیراعظم کے ہمراہ نائب وزیراعظم و وزیر خارجہ اسحاق ڈار، وفاقی وزیر دفاع خواجہ محمد آصف، وفاقی وزیر اطلاعات عطا اللہ تارڑ اور معاون خصوصی سید طارق فاطمی بھی دوحہ روانہ ہوگئے ہیں۔
پاکستان نے قطر کے ساتھ اپنے تعلقات کو انتہائی اہمیت دیتے ہوئے اسرائیلی جارحیت کی شدید مذمت کی ہے۔ وزیراعظم شہباز شریف نے حالیہ دنوں میں دوحہ کا دورہ کرکے قطری قیادت کو پاکستان کی جانب سے قطر کی سلامتی و خودمختاری اور مشرق وسطیٰ میں امن کے لیے غیر متزلزل حمایت کا یقین دلایا تھا۔
یہ بھی پڑھیے: اسرائیل کو جنگی جرائم پر جوابدہ ٹھہرایا جائے، پاکستان نے عرب اسلامی ٹاسک فورس بنانے کی تجویز دیدی
15 ستمبر کو منعقد ہونے والا یہ ہنگامی اجلاس امت مسلمہ کے درمیان یکجہتی اور علاقائی امن کے قیام کے لیے ایک اہم سنگ میل قرار دیا جارہا ہے۔
