وزیراعلیٰ پنجاب مریم نواز نے کہا کہ ایک وقت تھا جب پاکستان کے ہی ایک وزیراعظم کو غیر ذمہ دارانہ حرکتوں پر جہاز سے اُتار دیا گیا تھا، لیکن آج تاریخ نے رخ بدلا ہے اور وزیراعظم شہباز شریف کا جہاز جیسے ہی سعودی فضائی حدود میں داخل ہوا تو سعودی جنگی طیاروں نے سلامی دی۔ انہوں نے کہا کہ یہ عزت و وقار کسی سیاسی شخصیت کے لیے نہیں بلکہ پاکستان کے لیے ہے۔
مزید پڑھیں: وزیراعظم شہباز شریف سعودی عرب پہنچ گئے، جنگی طیاروں کی جانب سے وزیراعظم کا شاندار استقبال
سرگودھا میں الیکٹرک بس سروس کا افتتاح کیا اور اس موقع پر مریم نواز نے سابق وزیراعظم پر تنقید کرتے ہوئے کہا کہ اڈیالہ جیل میں موجود شخص کو یہ اندازہ ہی نہیں کہ پاکستان کہاں سے کہاں پہنچ چکا ہے۔
انہوں نے کہا کہ شہباز شریف کی تذلیل کرنے کی کوشش کی گئی مگر سعودی عرب میں جو عزت ملی وہ سب کے سامنے ہے۔ سعودی قیادت نے دنیا کو واضح پیغام دیا ہے کہ پاکستان پر حملہ سعودی عرب پر حملہ تصور ہوگا۔
وزیراعلیٰ پنجاب نے کہا کہ یہ صرف کاغذی معاہدہ نہیں بلکہ ایک عظیم دفاعی کامیابی ہے۔ حرمین شریفین کی پاسبانی کا شرف پاکستان کو ملنا ہمارے ملک کے لیے سب سے بڑی سفارتی اور تاریخی کامیابی ہے۔
تقریب سے خطاب کرتے ہوئے ان کا مزید کہنا تھا کہ آج شہر کے عوام کے لیے 33 الیکٹرک بسوں کا تحفہ لائی ہوں، پورے شہر کے لیے 60 اور سرگودھا ڈویژن کے لیے مجموعی طور پر 105 بسیں فراہم کی جائیں گی۔ ان کا کہنا تھا کہ یہ جدید بسیں عوام کو معیاری اور ماحول دوست سفری سہولت فراہم کریں گی۔
مزید پڑھیں: سعودی عرب میں وزیراعظم شہباز شریف کا والہانہ استقبال، دنیا میں پاکستان کی بڑھتی اہمیت کا عکاس
وزیراعلیٰ پنجاب نے اس موقع پر دل کے امراض کے علاج کے لیے بڑے منصوبے کا بھی اعلان کیا۔ انہوں نے کہا کہ یہ جان کر حیرت ہوئی کہ پورے سرگودھا ڈویژن میں کارڈیالوجی اسپتال موجود نہیں تاہم اب ’نواز شریف انسٹیٹیوٹ آف کارڈیولوجی‘ پر باقاعدہ کام شروع ہوگیا ہے۔ اس اقدام سے دل کے مریضوں کو فیصل آباد یا دیگر شہروں میں جانے کی ضرورت نہیں رہے گی۔
سیلابی صورتحال پر بات کرتے ہوئے مریم نواز نے کہا کہ پنجاب نے حالیہ دنوں تاریخ کے بدترین سیلاب کا سامنا کیا۔ 3 دریاؤں میں آنے والے پانی سے 27 شہر اور 5 ہزار سے زائد دیہات متاثر ہوئے۔ مگر حکومت کی بروقت تیاری کی بدولت بڑے پیمانے پر نقصان سے بچاؤ ممکن ہوا۔
انہوں نے بتایا کہ 25 لاکھ افراد کو محفوظ مقامات پر منتقل کیا گیا، متاثرہ خاندانوں کو خیمے اور خوراک فراہم کی گئی جبکہ 22 لاکھ سے زائد مویشی بھی بچا لیے گئے۔
