رشب شیٹی کی فلم کانتارا چیپٹر 1 سنیما گھروں کی زینت بنتے ہی پہلے دن بھارت میں 60 کروڑ بھارتی روپے کا بزنس کرکے شاندار آغاز کیا۔
یہ فلم 2022 کی بلاک بسٹر کانتارا کا پری کوئل ہے جو کَنّڑ، تیلگو، تمل، ہندی اور ملیالم زبانوں میں ریلیز کی گئی۔ ٹریڈ ویب سائٹ سکنلک کے مطابق فلم نے ریلیز کے پہلے 24 گھنٹوں میں 1.28 ملین سے زائد ٹکٹیں فروخت کیں۔
یہ بھی پڑھیے: پاک برطانیہ فلم فیسٹیول، دوسرا ایڈیشن 11،12 اکتوبر کو لندن میں ہوگا
پہلے دن بھارت بھر میں فلم کے 8,800 سے زائد شوز لگائے گئے۔ کَنّڑ زبان میں تقریباً 1,500 شوز کے ساتھ 88 فیصد اوکیوپینسی حاصل ہوئی، جب کہ تیلگو اور تمل میں 70 فیصد سے زائد اور ملیالم میں تقریباً 65 فیصد اوکیوپینسی ریکارڈ کی گئی۔ ہندی زبان میں سب سے زیادہ یعنی 4,700 شوز پیش کیے گئے لیکن اوکیوپینسی 30 فیصد رہی۔
کانتارا چیپٹر 1 نے 2025 میں تیسرے سب سے بڑے اوپننگ ڈے کا ریکارڈ قائم کیا۔ اس سے آگے صرف رجنی کانتھ کی کولی (65 کروڑ) اور پون کلیان کی دے کال ہِم او جی (63.75 کروڑ بھارتی روپے) ہیں۔ فلم نے وکی کوشل کی چھاوا (52 کروڑ بھارتی روپے) اور سَیّارا کے ریکارڈز کو پیچھے چھوڑ دیا۔
ہندی میں فلم نے تقریباً 19 سے 21 کروڑ روپے کمائے جو کسی بھی کَنّڑ فلم کی دوسری سب سے بڑی اوپننگ ہے۔ اس فہرست میں پہلے نمبر پر کے جی ایف چیپٹر 2 ہے جس نے 54 کروڑ روپے کمائے تھے۔
یہ بھی پڑھیے: پریش راول کو فلم ’دی تاج اسٹوری‘ کا پوسٹر کیوں ہٹانا پڑا؟
صرف پہلے دن کے بزنس کے ساتھ ہی کانتارا چیپٹر 1 2025 کی سب سے زیادہ کمائی کرنے والی ٹاپ 10 فلموں میں شامل ہوگئی ہے۔
2022 کی کانتارا ایک چھوٹے بجٹ کی فلم تھی جس نے عالمی سطح پر 407 کروڑ روپے کمائے تھے۔ اس کا پری کوئل بڑے بجٹ، وسیع کینوس اور شاندار سنیما ٹیکنیک کے ساتھ سامنے آیا ہے۔
رشب شیٹّی کی ہدایت کاری اور اداکاری میں بننے والی اس فلم میں رکمِنی واسنتھ، گلشن دیویاہ اور جیارام بھی اہم کرداروں میں شامل ہیں۔
