بیجنگ میں پاکستانی سفارتخانے اور چائنا انٹرنیشنل کلچرل کمیونیکیشن سینٹر کے اشتراک سے پاکستان اور چین کا پہلا مشترکہ فیشن شو عظیم دیوارِ چین کے مقام ’بادالنگ‘ پر منعقد ہوا۔
تقریب میں پاکستانی ڈیزائنرز ماہین خان، معظّم عباسی، عائشہ طارق، رضواللہ اور زین ہاشمی نے اپنے خصوصی کلیکشن پیش کیے جو پاکستانی اور چینی فیشن کے حسین امتزاج کی عکاسی کرتے تھے۔ چین میں مقیم پاکستانی ڈیزائنر عقیل چوہدری نے اپنے زیورات کا کلیکشن بھی پیش کیا، جبکہ معروف چینی ڈیزائنر لیانگ سُو یون کے تخلیقی ملبوسات بھی شو کا حصہ تھے۔ شو کی کیوریٹنگ معروف فیشن ماہر عدنان انصاری (ریوایت) نے کی۔
یہ بھی پڑھیں: جدہ میں ’میڈ ان پاکستان‘ نمائش پاکستانی مصنوعات کے فروغ کے لیے تاریخی قدم
اس موقع پر چین کے اعلیٰ سرکاری حکام، میڈیا نمائندگان، کاروباری شخصیات اور سفارتی حلقوں کے اراکین نے شرکت کی۔
’دیوار چین فیشن شو کے لیے بہترین مقام، شاہراہِ ریشم کے تاریخی تعلق کو جدید طرز میں منانے کی علامت‘
پاکستانی سفیر خلیل ہاشمی نے تقریب سے خطاب کرتے ہوئے کہا کہ عظیم بادالنگ دیوارِ چین اس فیشن شو کے لیے ایک بہترین مقام ہے جو شاہراہِ ریشم کے تاریخی تعلق کو جدید طرز میں منانے کی علامت ہے۔
The journey of fashion continues!
Tomorrow, the next leg of our Fashion Show – this time in Beijing, will bring two additional Pakistani designers and a celebrated Chinese designer.
Set against the majestic backdrop of the Badaling Great Wall, this spectacular showcase will… pic.twitter.com/40lQ3sP8hF
— Khalil Hashmi (@KhalilHashmi) October 18, 2025
انہوں نے کہا کہ یہ فیشن شو تخلیقی امتزاج، تجارتی وژن اور پاکستانی فیشن کی طاقت کا مظہر ہے، جو دونوں ممالک کے درمیان تخلیقی اور تجارتی تعلقات کے نئے پل قائم کر رہا ہے۔
’فیشن شو چین اور پاکستان کے درمیان ثقافتی تبادلے کا ایک شاندار مظہر ہے‘
چائنا انٹرنیشنل کلچرل کمیونیکیشن سینٹر کے چیئرمین لونگ یوشیانگ نے کہا کہ یہ فیشن شو چین اور پاکستان کے درمیان ثقافتی تبادلے کا ایک شاندار مظہر ہے اور دونوں ممالک کی ’ہمہ موسمی اسٹریٹیجک شراکت داری‘ کو عوامی سطح پر مزید مضبوط بنانے کی عملی مثال ہے۔ انہوں نے کہا کہ دونوں ممالک کے درمیان گہری تہذیبی وراثت اور خوبصورت زندگی کے مشترکہ خواب فیشن کے ذریعے نئی صورت اختیار کر رہے ہیں۔
یہ بھی پڑھیں: بیجنگ کے 10 ایسے مقامات جو آپ کو ضرور دیکھنے چاہییں
لونگ یوشیانگ نے امید ظاہر کی کہ دونوں ممالک کے ڈیزائنرز روایتی جمالیات کی جدید تعبیرات کو فروغ دے کر فیشن کے میدان میں نئی توانائی اور جدت پیدا کریں گے۔
واضح رہے کہ ’بادالنگ‘ دیوارِ چین کا سب سے معروف حصہ ہے، اور رواں سال پاکستان کی کسی اعلیٰ شخصیت کے اس تاریخی مقام کے پہلے دورے کی 60 ویں سالگرہ بھی منائی جا رہی ہے۔
