ڈھاکہ کے معروف علاقے میرپور میں پہلے ون ڈے میں بنگلہ دیش اور ویسٹ انڈیز کے درمیان اسپن کی جنگ کے بعد دوسرے ون ڈے میں ویسٹ انڈیز نے حیران کن حکمت عملی اپنائی۔
یہ بھی پڑھیں: ویسٹ انڈیز کا عروج اور انضمام کی ناقابل شکست اننگز
میرپور کے اسی میدان میں ویسٹ انڈیز نے اننگز کے آغاز سے ہی 5 اسپنرز کا استعمال کیا جو کہ ایک تاریخی لمحہ ہے۔
اوپن اٹیک سے اینڈ تک صرف اسپنرز ہی وکٹ کے دونوں سروں سے بولنگ کرتے دکھائی دیے۔
ویسٹ انڈیز کا اسپن پر انحصار، منفرد حکمت عملی
پہلے ون ڈے میں شکست کے بعد جہاں بنگلہ دیشی اسپنرز نے میچ پر گرفت مضبوط رکھی ویسٹ انڈیز کی ٹیم دوسرے میچ میں بھرپور تیاری کے ساتھ میدان میں اتری۔ انہوں نے صرف ایک یا 2 نہیں بلکہ 5 اسپنرز کو استعمال کیا جنہوں نے اننگز کے ابتدائی اوورز سے بولنگ کی۔
یہ ون ڈے کرکٹ کی تاریخ میں صرف 5واں موقع ہے کہ کسی فل رکن ٹیم نے دونوں اینڈز سے اسپنرز کے ذریعے اننگز کا آغاز کیا ہو۔
اس سے قبل یہ منظر 3 بار ڈھاکہ میں ہی دیکھا گیا۔ بنگلہ دیش کی جانب سے 2 بار سنہ 2018 میں اور ایک بار سنہ 2022 میں۔ اس کے علاوہ صرف ایک بار ایسا نیوزی لینڈ اور جنوبی افریقہ کے درمیان سنہ 2017 میں ہملٹن میں ہوا جب جیتان پٹیل اور مچل سینٹنر نے بولنگ کا آغاز کیا۔
مزید پڑھیں: ویسٹ انڈیز کی تاریخ ساز فتح، 34 سال بعد پاکستان کے خلاف سیریز جیت لی
مزید حیران کن بات یہ ہے کہ آج سے پہلے صرف 5 بار کسی کپتان نے ابتدائی 4 بولرز اسپنرز کے طور پر استعمال کیے اور وہ تمام مواقع ایسوسی ایٹ ٹیموں کے درمیان ہوئے۔ لیکن یہ پہلا موقع ہے کہ فل رکن ممالک کے درمیان کسی ون ڈے میچ میں ابتدائی 5 بولرز اسپنرز ہوں یعنی ایک نئی تاریخ رقم ہوئی ہے۔
ڈھاکہ کی پچ کی سست رفتار اور گھماؤ کے پیش نظر یہ حکمت عملی سودمند ثابت ہوئی۔ ویسٹ انڈیز نے خاص طور پر ان حالات کو مدنظر رکھتے ہوئے اسپنر عقیل حسین کو کیریبین سے بلا کر ٹیم میں شامل کیا۔
اس وقت تک ویسٹ انڈیز کے لیے عقیل حسین، روستن چیز، خاری پیئر، گُڈاکیش موٹی اور الِک اتھناز باؤلنگ کر چکے ہیں۔ 28 اوورز کے اختتام پر بنگلہ دیش نے 4 وکٹوں کے نقصان پر 96 رنز بنائے ہیں۔
مزید پڑھیں: ویسٹ انڈیز کے سابق آل راؤنڈر برنارڈ جولیئن 75 برس کی عمر میں انتقال کرگئے
گزشتہ میچ میں بنگلہ دیش نے اسپن پر انحصار کرتے ہوئے ویسٹ انڈیز کو 74 رنز سے شکست دی تھی جہاں نوجوان اسپنر رشاد حسین نے 6 وکٹیں حاصل کی تھیں۔ امکان ہے کہ بنگلہ دیش اس میچ میں بھی اسپن کا سہارا لے گا۔
