وزیراعظم محمد شہباز شریف نے کہا ہے کہ ریجنل ٹرانسپورٹ منسٹرز کانفرنس نے علاقائی ممالک کو باہمی تعاون اور رابطوں کے فروغ کے لیے ایک اہم موقع فراہم کیا ہے۔
انہوں نے حکومتِ پاکستان اور عوام کی جانب سے تمام بین الاقوامی مندوبین کو خوش آمدید کہا۔
وزیراعظم نے کہا کہ کانفرنس نہ صرف دوطرفہ تعلقات بلکہ علاقائی رابطوں کے فروغ کے لیے بھی اہم سنگ میل ثابت ہوگی۔
ان کے مطابق، موجودہ دور میں دنیا بھر میں ٹرانسپورٹ اور روابط کے نظام میں نمایاں تبدیلیاں رونما ہو رہی ہیں، اور پاکستان اس عمل میں فعال کردار ادا کرنے کے لیے پُرعزم ہے۔
مزید پڑھیں: وزیراعظم محمد شہباز شریف نے بجلی کی قیمتوں میں 7 روپے 41 پیسے فی یونٹ کمی کا اعلان کردیا
شہباز شریف نے کہا کہ ہمارا خطہ صدیوں سے بیلٹ اینڈ روڈ اور قدیم شاہراہِ ریشم جیسے تجارتی و ثقافتی روابط کا محور رہا ہے۔ آج کی بدلتی معیشت نے اس قدیم گزرگاہ کی اہمیت میں مزید اضافہ کر دیا ہے۔
وزیراعظم نے مزید کہا کہ پاکستان کی گوادر کی طویل ساحلی پٹی اور کراچی بندرگاہ عالمی میرین سلک روڈ کا لازمی حصہ ہیں، جو خطے میں تجارتی اور اقتصادی سرگرمیوں کے فروغ کے لیے بنیادی کردار ادا کریں گی۔
پاکستان اقتصادی راہداری کے دوسرے مرحلے میں داخل، علاقائی رابطوں کا نیا دور شروع ہوگا: وزیراعظم شہباز شریف
وزیراعظم محمد شہباز شریف نے کہا ہے کہ پاکستان چین پاکستان اقتصادی راہداری (CPEC) کے دوسرے مرحلے میں داخل ہو رہا ہے، جس کا بنیادی فوکس کاروباری روابط، سرمایہ کاری اور مشترکہ خوشحالی پر ہے۔
مزید پڑھیں: وزیراعظم محمد شہباز شریف کا دورہ کراچی، مصروفیات کیا ہوں گی؟
وزیراعظم نے کہا کہ علاقائی روابط میں اضافہ خطے کی معاشی اور تجارتی ترقی کے لیے انقلابی ثابت ہوگا۔ پاکستان ٹرانس افغان ریلوے اور اسلام آباد-تہران-استنبول ریلوے منصوبے پر فعال انداز میں کام کر رہا ہے، جو خطے کی اقتصادی صلاحیتوں کو یکجا کرنے میں مددگار ہوں گے۔
شہباز شریف نے کہا کہ تجارت، معیشت اور توانائی کے شعبوں میں قریبی تعاون سے ترقی کے ایک نئے دور کا آغاز ہو گا۔ ان کے مطابق، بڑے علاقائی منصوبے مشترکہ خوشحالی کے دروازے کھولنے کے ساتھ ساتھ خطے میں امن اور استحکام کو بھی مضبوط کریں گے۔
وزیراعظم نے کہا کہ موجودہ ڈیجیٹل دور میں رابطے صرف سڑکوں، ریل یا فضائی راستوں تک محدود نہیں رہے، بلکہ آج کا زمانہ ڈیٹا، ٹیکنالوجی اور تکنیکی انضمام سے وابستہ ہے۔
انہوں نے کہا کہ پاکستان ڈیجیٹل انفراسٹرکچر میں سرمایہ کاری کر رہا ہے تاکہ جدید معیشت کا حصہ بن سکے اور عالمی ترقی کی رفتار کے ساتھ قدم ملا سکے۔
