وزیراعظم محمد شہباز شریف نے بجلی کی قیمتوں میں 7 روپے فی یونٹ کمی کا اعلان کیا ہے۔ اب تمام گھریلو صارفین کے لیے بجلی 34 روپے 37 پیسے فی یونٹ ہوگی۔ صنعتی صارفین کے لیے 7 روپے 59 پیسے فی یونٹ کمی ہوگی یوں صنعتی صارفین کے لیے فی یونٹ 40 روپے 60 پیسے ہوگا۔
وزیراعظم محمد شہباز شریف نے اسلام آباد میں بجلی کے نرخوں میں کمی کے حکومتی پیکج کے حوالے سے منعقدہ تقریب سے خطاب کرتے ہوئے کہا کہ عوام کو ریلیف حکومت کی اولین ترجیح ہے۔ پاکستان کی معاشی ترقی کے حوالے سے آپ کو خوشخبری سنانے آیا ہوں اور الحمدللہ وہ وعدہ پورا ہوا جو مسلم لیگ ن کے قائد میاں محمد نواز شریف نے اپنے منشور میں وعدہ کیا تھا۔ یہ بھی اعتراف کرنا چاہوں گا کہ اس سارے عمل میں آرمی چیف جنرل سید عاصم منیر کا کلیدی کردار رہا ہے۔
وزیر اعظم شہباز شریف نے گھریلو صارفین کے لیے بجلی کی قیمتوں میں 7 روپے 41 پیسے فی یونٹ کمی کر دی pic.twitter.com/fG7rhZJycu
— WE News (@WENewsPk) April 3, 2025
ان کا کہنا تھا کہ ہم نے ایسے پر خطر اور دشوار گزار چیلنجز کا سامنا کرنا پڑا، جب ہم نے اقتدار سنبھالا تو ملک پر دیوالیہ ہونے کی تلوار لٹک رہی تھی۔ عوام پریشان تھے، عدم استحکام عروج پر تھا جبکہ آئی ایم ایف بات سننے کو تیار نہیں تھا۔ ڈسکوز کی نجکاری کرنا ہوگی، ہم کچھ عرصہ مزید محنت کرکے پھر حاضر ہوں گے اور بجلی مزید سستی کریں گے۔ ہمارے صنعتکار دن رات کام کریں، حکومت آپ کی خدمت کرے گی۔ میں آپہ سب کا چیف ایگزیکٹو آفیسر ہوں، وزیراعظم نہیں۔ ہم مسلسل محنت کے ذریعے پاکستان کو خودانحصاری پر لے جائیں گے۔
مزید پڑھیں: عوام کے لیے ریلیف: آئی ایم ایف نے حکومت کو بجلی ٹیرف میں کمی کی اجازت دے دی
وزیر اعظم نے کہ کہ ایل سی کھلوانے کے لیے بھی تگ و دو کرنا پڑتی تھی کہ ملک میں آئل کی قلت نہ ہو، کارخانے بند نہ ہو جائیں۔ پاکستان کو دیوالیہ کرنے اور افراتفری کا شکار کرنے والے خوشی سے مرے جا رہے تھے کہ اب پاکستان کو دیوالیہ پن سے نہیں بچایا جا سکتا۔ ان کے لیے یہی کہ تقدیر کی لکھی موت کوئی ٹال نہیں سکتا۔
ان کا کہنا تھا کہ یہ ٹولہ ملک دشمنی میں تمام حدیں پار کرگیا اور آئی ایم ایف سے لیے اپنے ہی معاہدے کو خود توڑا۔ ہماری راہ میں رکاوٹیں کھڑی کی گئیں، آئی ایم ایف کو خطوط لکھے گئے اور ملکی مفادات کو اپنی سیاست پر قربان کردیا۔ لیکن مدعی لاکھ برا چاہے تو کیا ہوتا ہے، وہی ہوتا ہے جو منظور نظر ہوتا ہے۔ الحمدللہ ملک میں معاشی استحکام آچکا ہے، اس ضمن میں عام آدمی کی دعاؤں اور برداشت قابل تحسین ہے۔
ان کا کہنا تھا کہ اللہ کے کرم، قوم کی دعاؤں اور حکومتی کاوشوں کی بدولت مہنگائی سنگل ڈیجٹ میں آ چکی ہے، 38 سے اسے ڈیڑھ فیصد پر لایا جا چکا ہے۔ ساڑھے 22 فیصد شرح سود 12 فیصد پر آ چکا ہے۔ پیٹرول پر 38 روپے تک کمی کی گئی۔
مزید پڑھیں: عوام کے لیے خوشخبری، ملک بھر میں بجلی سستی کرنے کے لیے درخواست نیپرا میں جمع
وزیراعظم نے کہا کہ ہماری ٹیم نے آئی پی پیز سے مذاکرات کرکے 3696 ارب روپے جو مطلوب تھے وہ اب ادا نہیں کرنا پڑیں گے، ان آئی پی پیز کی ایوریج قیمت 15 سال تک 3696 ارب روپے دینے تھے جو اس ٹیم نے بچا لیے ہیں۔ 2393 ارب روپے یعنی 2 کھرب 393 ارب روپے کا گردشی قرضہ ہے، جس کا بھی انتظام کر لیا گیا ہے اور اگلے 5 سال میں یہ گردشی قرضہ ختم ہو جائے گا۔
تقریب میں نائب وزیراعظم و وزیر خارجہ اسحاق ڈار سمیت وفاقی کابینہ کے تمام اراکین، بزنس کمیونٹی اور دیگر شعبہ جات سے تعقل رکھنے والے افراد کی بڑی تعداد موجود تھی۔ تقریب کے آغاز تلاوت کلام پاک اور نعت شریف بھی پیش کی گئی۔
وزیر بجلی و توانائی سردار اویس لغاری نے کہا کہ گزشتہ ایک برس میں وزیر اعظم نے جو جو ہدایت دیں ہم نے اس پر عمل کیا۔ میں اپنی پوری ٹیم کا شکر گزار ہوں جس اس کامیابی میں میرے ساتھ شریک تھی۔ ہم جب صبح سو کر اٹھتے تھے تو چار بجے بھی وزیر اعظم کی ہدایات اور تجاویز موبائیل فون پر موجود ہوتی تھیں۔
