وزیرِاعظم محمد شہباز شریف نے اتوار کو پاکستان مسلم لیگ ن کے رہنما اور سابق رکن قومی اسمبلی جسٹس (ریٹائرڈ) افتخار احمد چیمہ کے انتقال پر گہرے دکھ کا اظہار کیا۔
وزیرِاعظم آفس کے میڈیا ترجمان کے مطابق وزیرِاعظم شہبازشریف نے مرحوم کے بھائیوں، سابق آئی جی موٹر وے پولیس ظفر احمد چیمہ اور سابق رکن قومی اسمبلی ڈاکٹر نثار احمد چیمہ سے ٹیلیفون پر تعزیت کا اظہار کیا۔
دوسری جانب اسپیکر قومی اسمبلی سردار ایاز صادق نے بھی سابق رکن قومی اسمبلی جسٹس (ریٹائرڈ) افتخار احمد چیمہ کے انتقال پر گہرے رنج و غم کا اظہار کیا ہے۔
https://Twitter.com/MuddsarNazir/status/1987540899598061893
اپنے تعزیتی پیغام میں اسپیکر نے مرحوم کے اہل خانہ کے لیے دلی ہمدردی اور تعزیت کا اظہار کرتے ہوئے دعا کی کہ اللہ تعالیٰ مرحوم کی روح کو ابدی سکون عطا فرمائے اور اہل خانہ کو اس ناقابلِ تلافی نقصان کو برداشت کرنے کی ہمت اور صبر دے۔
اسپیکر نے مرحوم جسٹس (ریٹائرڈ) افتخار احمد چیمہ کی سیاسی اور قومی خدمات کو بھی سراہتے ہوئے کہا کہ عوامی زندگی اور قوم کے لیے ان کی خدمات ہمیشہ عزت کے ساتھ یاد رکھی جائیں گی۔
انہوں نے مزید کہا کہ ان کے جانے سے پیدا ہونے والا خلا طویل عرصے تک پر کرنا مشکل ہوگا۔
