جنوبی افریقہ میں شروع ہونے والے جی-20 اجلاس میں بعض رکن ممالک نے روس اور یوکرین کے درمیان جنگ ختم کرنے کے لیے پیش کردہ امن منصوبے پر غور کیا۔ اجلاس جمعہ اور ہفتہ کو جوہانسبرگ میں منعقد ہوا، جبکہ امریکا نے جنوبی افریقہ کی پالیسیوں کی وجہ سے بائیکاٹ کیا۔
یہ بھی پڑھیں: روس یوکرین علاقائی تنازع: زیلنسکی، پیوٹن سے براہ راست مذاکرات کے لیے تیار
نیو یارک ٹائمز کے مطابق پیش کردہ 28 نکاتی منصوبے میں یوکرینی قیادت سے مطالبہ کیا گیا ہے کہ وہ روس کے زیر قبضہ علاقے تسلیم کرے اور اپنی فوجی طاقت کو محدود کرے، جسے یوکرین نے پہلے مسترد کر دیا تھا۔
دی گارڈین کے مطابق منصوبے کے تحت روس کو مشرقی ڈونباس کے بعض علاقوں کا کنٹرول دیا جائے گا اور یوکرین کو نیٹو میں شامل ہونے کے امکانات سے دستبردار ہونا پڑے گا۔
صدر ڈونلڈ ٹرمپ نے اس منصوبے کو یوکرین کے صدر ولودیمیر زیلنسکی کو پیش کیا اور انہیں مشورہ دیا کہ وہ اگلے ہفتے تک اس کو قبول یا مسترد کرنے کا فیصلہ کریں۔
یہ بھی پڑھیں: ’یوکرین کو اب روس سے امن معاہدہ کرنا پڑے گا‘، جنگ بندی کی امیدیں معدوم ہونے پر صدر ٹرمپ کی ’کمزور‘ کو نصیحت
جی-20 اجلاس میں شریک یورپی رہنماؤں نے ایک علیحدہ اجلاس میں منصوبے کا جائزہ لیا اور کہا کہ اسے ان کی حمایت حاصل کرنے کے لیے نظرثانی کی ضرورت ہے۔
انہوں نے مشترکہ بیان میں کہا کہ منصوبے میں بعض اہم عناصر شامل ہیں جو منصفانہ اور دیرپا امن کے لیے ضروری ہوں گے، لیکن یہ ابتدائی بنیاد ہے اور مزید کام درکار ہے۔
انہوں نے واضح کیا کہ سرحدیں طاقت کے ذریعے تبدیل نہیں ہونی چاہئیں۔ برطانیہ، فن لینڈ، فرانس، جرمنی، آئرلینڈ، اٹلی، نیدرلینڈز، ناروے، اسپین اور یورپی یونین کے نمائندوں نے اس بیان پر دستخط کیے۔
اجلاس میں کئی ممالک نے منصوبے پر غور کیا، جبکہ جنوبی افریقہ کے صدر سرل رامافوسا نے دنیا کی 20 بڑی معیشتوں کے اس اجلاس کا افتتاحی خطاب کیا۔ بھارتی وزیر اعظم نریندر مودی نے جنوبی افریقہ میں جی-20 کے اجلاس کی تعریف کرتے ہوئے کہا کہ اب وقت آ گیا ہے کہ دنیا کی بڑی معیشتیں پائیدار ترقی کی حمایت کریں۔
یہ بھی پڑھیں: یورپی یونین کو دھچکا، نیٹو ممبر کا منجمند روسی اثاثوں پر یوکرین کو قرض دینے سے انکار
انہوں نے ایک پوسٹ میں کہا کہ بھارت کی تہذیبی اقدار، خاص طور پر جامع انسانیت کے اصول، ترقی کی راہ دکھا سکتے ہیں۔
