نائجیریا کے شمال مغربی علاقے سے اغوا کی گئی تمام 24 اسکول طالبات کو ایک ہفتے سے زائد قید میں رہنے کے بعد بازیاب کرالیا گیا ہے جس کی حکام نے اس کی باضابطہ تصدیق کر دی۔
یہ بھی پڑھیں: نائجیریا: مسلح افراد کا ایک ہفتے میں دوسری بار اسکول پر حملہ، 215 طلبا اغوا
طالبات کو 17 نومبر کو اس وقت اغوا کیا گیا تھا جب مسلح افراد نے ریاست کیبّی کے گاؤں ماگا میں واقع گورنمنٹ گرلز کمپری ہینسو سیکنڈری اسکول پر حملہ کیا۔
مغربی افریقی ملک کی پولیس کے مطابق اس حملے میں اسکول کے 2 عملے کے افراد بھی ہلاک ہوئے۔
ابتدائی طور پر حکام نے 25 لڑکیوں کے اغوا کی اطلاع دی تھی تاہم بعد میں واضح کیا گیا کہ ایک لڑکی حملے کے فوراً بعد اغواکاروں سے بچ نکلنے میں کامیاب ہوگئی تھی۔
منگل کے روز صدر بولا ٹینوبو کے ایک خصوصی مشیر نے بیان میں کہا کہ کیبّی کا واقعہ، کوارا ریاست کے ااروکو اور نائجر ریاست کے پاپیری میں نقل کرنے جیسے دیگر اغوا کے واقعات کا باعث بھی بنا۔
مزید پڑھیے: نائجیریا میں اسکول پر مسلح افراد کا حملہ، 25 طالبات اغوا، وائس پرنسپل ہلاک
انہوں نے بتایا کہ ٹینوبو کو اس بات پر اطمینان ہے کہ تمام 24 لڑکیاں محفوظ پائی گئی ہیں اور انہوں نے مزید اغوا کے واقعات کی روک تھام کے لیے حساس علاقوں میں فوج کی اضافی تعیناتی کا حکم دیا ہے۔
صدر نے سیکیورٹی فورسز کے ’فوری ردعمل‘ کو سراہا تاہم یہ نہیں بتایا گیا کہ لڑکیوں کو کس طرح بازیاب کرایا گیا۔
نائجیریا میں حالیہ دنوں میں پرتشدد حملوں اور اغوا کے واقعات میں تشویش ناک اضافہ ہوا ہے جس کے باعث صدر نے جی 20 سمٹ میں شرکت کے لیے اپنا جنوبی افریقہ کا دورہ منسوخ کر دیا۔
گزشتہ جمعے مسلح افراد نے پاپیری میں سینٹ میری کیتھولک اسکول پر دھاوا بول کر 300 سے زائد طلبہ اور 12 اساتذہ کو اغوا کر لیا جو ملک کے بدترین اجتماعی اغواؤں میں سے ایک قرار دیا جا رہا ہے۔
مزید پڑھیں: نائیجیریا میں 60 سال کا سب سے تباہ کن سیلاب، 151 سے زائد افراد ہلاک
اتوار کو کرسچن ایسوسی ایشن آف نائجیریا نے بتایا کہ 50 طلبہ اپنے اغواکاروں سے فرار ہونے میں کامیاب ہوگئے جبکہ باقی ابھی تک لاپتا ہیں۔
اسی ہفتے کوارا ریاست کے ایروکو میں چرچ پر حملے کے دوران 38 افراد کو اغوا اور 2 کو قتل کیا گیا تھا تاہم اتوار تک تمام مغوی چرچ جانے والوں کو آزاد کرا لیا گیا۔
منگل کی رات صدر ٹینوبو نے ایک الگ بیان میں بتایا کہ انہوں نے کوارا ریاست کے جنگلات میں سیکیورٹی محاصرہ سخت کرنے کا حکم دے دیا ہے۔
یہ بھی پڑھیے: نائیجیریا کی شیف کا لگاتار 100گھنٹے تک کھانا بنانے کا ریکارڈ
ان کے مطابق ایئر فورس کو ہدایت دی گئی ہے کہ وہ دور دراز علاقوں پر مسلسل نگرانی رکھے اور زمینی دستوں کے ساتھ مشترکہ آپریشن کے ذریعے دشمن عناصر کی نشاندہی، انہیں الگ تھلگ کرنا اور مکمل طور پر ناکارہ بنانا یقینی بنائے۔
