بھارتی اداکارہ اور رقاصہ راکھی ساونت نے حال ہی میں کپل شرما کے شو کا حصہ نا بننے پر کھل کر بات کی کہ وہ کبھی بھی کپل شرما کے شو کا حصہ کیوں نہیں بن سکیں۔
راکھی ساونت کے مطابق کپِل شرما انہیں اس خوف سے اپنے شو میں شامل نہیں کرتے کہ وہ انہیں اوور شائن کر دیں گی۔ انہوں نے کہا کہ ’کپل شرما اسی کو شو میں لاتا ہے جو اس کی چمچہ گیری کرتا ہے‘۔ اداکارہ کا کہنا تھا کہ ’بھائی میں تیری چمچہ گیری کر لوں گی‘۔
یہ بھی پڑھیں: ‘ایلون مسک نے 5 لاکھ درہم کا لباس تحفے میں دیا’، دلچسپ دعوؤں سے بھرپور راکھی ساونت کی ویڈیو وائرل
ان کا کہنا تھا کہ ’میں نے کپل کو کتنی بار بولا کہ مجھے اپنے کامیڈی شو میں بلاؤ کیونکہ دنیا کہتی ہے کہ تم کامیڈی شو میں آؤ تمہاری کامیڈی اچھی ہے لیکن کپل کو مسئلہ ہوتا ہے کہ میں اس کو اوور شائن کر دوں گی، وہ کہتا ہے تمہیں شو میں لوں گا تو تم ہی دکھوگی، ہم نہیں دکھیں گے‘۔
راکھی ساونت نے دورانِ گفتگو اپنے ماضی کی جدوجہد کا ذکر کرتے ہوئے بتایا کہ وہ محض 10 برس کی عمر میں ایک کیٹرر کے ساتھ روزانہ کی اجرت پر کام کرتی تھیں۔ انہوں نے انکشاف کیا کہ 1991 میں انیل امبانی اور اداکارہ ٹینا منیم کی شادی میں انہوں نے 50 روپے یومیہ پر ویٹریس کے طور پر خدمات انجام دی تھیں۔
یہ بھی پڑھیں: ’ڈونلڈ ٹرمپ میرے حقیقی والد ہیں‘، راکھی ساونت کا حیران کن دعویٰ
واضح رہے کہ راکھی ساونت 2014 میں کامیڈی نائٹس وِد کپِل میں بطور مہمان شریک ہو چکی ہیں، جہاں ان کی موجودگی کو ناظرین نے خوب پسند کیا تھا۔ اس کے بعد متعدد سوشل میڈیا صارفین نے مطالبہ کیا تھا کہ انہیں شو میں مستقل جگہ دی جائے۔
راکھی ساونت نے انٹرٹینمنٹ انڈسٹری میں آئٹم گرل کے طور پر آغاز کیا اور چند فلموں میں بھی اداکاری کی۔ فلموں کے علاوہ راکھی ٹیلی ویژن کی دنیا میں بے حد کامیاب رہی ہیں۔ ان کے مشہور شوز میں بگ باس 1، بگ باس 14، نچ بلیے 3 وغیرہ شامل ہیں۔
