بلوچستان کے ضلع قلات میں سیکیورٹی فورسز نے خفیہ اطلاع کی بنیاد پر بھارتی پراکسی تنظیم فتنہ الہندوستان کے دہشت گردوں کیخلاف ایک کامیاب آپریشن کرتے ہوئے 12 بھارتی سرپرستی میں سرگرم دہشت گرد ہلاک کردیے ہیں۔
آئی ایس پی آر کے مطابق 6 دسمبر کو کی گئی اس کارروائی کے دوران فورسز نے دہشت گردوں کے ٹھکانے کو مؤثر انداز میں نشانہ بنایا اور شدید فائرنگ کے تبادلے کے بعد تمام مطلوب دہشت گردوں کا خاتمہ کر دیا۔
ہلاک دہشت گرد علاقے میں متعدد دہشت گرد سرگرمیوں میں ملوث رہے تھے۔ آپریشن کے مقام سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا ہے۔
مزید بتایا گیا کہ علاقے کو مکمل طور پر کلیئر کرنے کے لیے سینیٹائزیشن آپریشن جاری ہے۔
ترجمان کے مطابق سیکیورٹی فورسز اور قانون نافذ کرنے والے ادارے وفاقی ایپیکس کمیٹی کے منظور شدہ وژن ’عزم استحکام‘ کے تحت بھرپور رفتار سے انسدادِ دہشت گردی کی مہم جاری رکھے ہوئے ہیں، جس کا مقصد ملک سے بیرونی معاونت یافتہ اور سرپرستی شدہ دہشت گردی کا مکمل خاتمہ ہے۔
سیکیورٹی فورسز کو صدر زرداری کا خراج تحسین
صدرِ مملکت آصف زرداری نے قلات میں بھارتی پراکسی فتنہ الہندوستان کے خلاف بروقت اور مؤثر کارروائی کے دوران 12 دہشت گردوں کی ہلاکت پر سیکیورٹی فورسز کو خراجِ تحسین پیش کیا ہے۔
انہوں نے کہا کہ ریاست پاکستان ہر قیمت پر امن کے دشمنوں کو ان کے انجام تک پہنچانے کی مکمل صلاحیت رکھتی ہے اور قانون نافذ کرنے والے اداروں کی یہ کامیابی ملک میں امن و استحکام کے عزم کی واضح مثال ہے۔
مزید پڑھیں: خصدار میں سیکیورٹی فورسز کا آپریشن، فتنہ الہندوستان کے 4 دہشتگرد ہلاک
صدرِ مملکت نے قلات میں جاری کلیئرنس اور سینیٹائزیشن کارروائیوں پر بھی اطمینان کا اظہار کیا، جن کا مقصد علاقے کو مکمل طور پر دہشت گردی کے اثرات سے پاک کرنا ہے۔
اپنے بیان میں صدر آصف علی زرداری نے اس اعتماد کا اظہار کیا کہ قوم کا غیرمتزلزل عزم فتنہ الہندوستان کی ہر سازش کو ناکام بنائے گا۔
انہوں نے کہا کہ پاکستان کے عوام اور سیکیورٹی فورسز ایک دوسرے کے شانہ بشانہ دشمن کے تمام عزائم کو شکست دینے کے لیے متحد ہیں اور ملکی سلامتی و خودمختاری کے خلاف کسی بھی خطرے کا بھرپور جواب دیا جائے گا۔
آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں
