سینیئر سیاستدان و ممبر قومی اسمبلی شیر افضل مروت نے کہا ہے کہ پی ٹی آئی کے لیے کوئی دروازہ کھلتا ہوا نظر نہیں آرہا، وزیراعلیٰ خیبرپختونخوا سہیل آفریدی نے اپنے حلقے میں سیکیورٹی آپریشن کی اجازت دے دی ہے۔
یہ بھی پڑھیں: پی ٹی آئی احتجاج میں اب اجتماعی استخارہ ہوگا، شیرافضل مروت کا طنز
نجی ٹی وی سے گفتگو کرتے ہوئے شیر افضل مروت نے کہا کہ گزشتہ ایک ہفتے میں کے پی حکومت اور پی ٹی آئی کے کرتا دھرتاؤں نے وفاقی حکومت کو نوازا ہے، شاید دروازے کھولنے کی کوشش کی جارہی ہے، خیبرپختونخوا حکومت صوبے میں سیکیورٹی آپریشن کے حق میں نہیں تھی، تاہم اب وزیراعلیٰ سہیل آفریدی نے اپنے حلقے میں سیکیورٹی آپریشن کی اجازت دے دی ہے، اور آپریشن کے اخراجات بھی صوبائی حکومت برداشت کرے گی۔
انہوں نے کہا کہ افغانوں کے حوالے سے عمران خان کی پالیسی تھی کہ پورے پاکستان سے افغانوں کو نکالا جائے لیکن خیبرپختونخوا سے نہ نکالا جائے، اب صوبائی حکومت نے 90 فیصد افغانوں کو افغانستان دھکیل دیا ہے اور صوبے میں تمام افغان کیمپس ختم کر دیے گئے ہیں۔
یہ بھی پڑھیں: عمران ریاض کو نہ اٹھایا گیا، نہ ان کی زبان کٹی، شیر افضل مروت کا دعویٰ
شیر افضل مروت نے کہا کہ وزیراعلیٰ سہیل آفریدی کے نہ چاہتے ہوئے بھی یہ کام کروائے گئے ہیں، اور ان تمام چیزوں کی بھنک بھی ابھی تک عمران خان کو نہیں ملی ہے۔ عمران خان کی پالیسی نہ بدلی گئی ہے اور نہ اجازت دی گئی ہے۔
عمران خان کے بیٹوں قاسم اور سلیمان کے پاکستان آمد سے متعلق سوال کے جواب میں کہا کہ اس سے متعلق پہلے بھی شوشا چھوڑا گیا تھا، میرے خیال میں وہ نہیں آئیں گے اور اگر آئے تو حکومت آنے نہیں دے گی۔
