نائب وزیراعظم و وزیر خارجہ سینیٹر اسحاق ڈار نے وزارتِ خارجہ کی جانب سے فراہم کی جانے والی قونصلر سروسز کا جائزہ لینے کے لیے ایک اجلاس کی صدارت کی۔
ترجمان دفتر خارجہ کے مطابق اجلاس میں وزارتِ خارجہ کے قونصلر امور کے شعبے کی ٹیم نے نائب وزیراعظم و وزیر خارجہ کو تفصیلی بریفنگ دی، جس میں عوام کو فراہم کی جانے والی تصدیق اور اپوسٹیل سروسز کی اہم خصوصیات اور ان کے ہموار طریقہ کار سے آگاہ کیا گیا۔
نائب وزیراعظم و وزیر خارجہ نے قونصلر سروسز ٹیم کی جانب سے اٹھائے گئے اقدامات کا جائزہ لیا اور اس بات پر زور دیا کہ شفاف اور مؤثر تصدیقی عمل کو یقینی بنانا وزارتِ خارجہ کے مشن کی بنیاد ہے۔
انہوں نے مزید ہدایت کی کہ عوام کو کم سے کم لاگت اور بروقت سہولیات فراہم کرنے کے لیے کوششیں جاری رکھی جائیں۔
اجلاس میں معاون خصوصی برائے وزیراعظم طارق باجوہ اور وزارتِ خارجہ کے سینیئر حکام نے بھی شرکت کی۔
