موسمی سمندری مظہر کے باعث سمندر کے غیر معمولی سبز رنگ اختیار کرنے کے باوجود گوادر کے ساحلی پانی بدستور آبی حیات سے بھرپور ہیں، جہاں حال ہی میں بندرگاہی شہر کی مغربی خلیج میں بوٹل نوز ڈولفنز کے جھنڈ دیکھے گئے ہیں۔
ورلڈ وائلڈ لائف فنڈ یعنی ڈبلیو ڈبلیو ایف کی جانب سے جاری بیان کے مطابق نوکٹیلوکا بلوم موسمِ سرما میں رونما ہونے والا ایک سمندری عمل ہے، جو پاکستان کے ساحلوں پر سمندری پانی کے بڑے پیمانے پر سبز رنگ اختیار کرنے کا سبب بنا ہے۔
یہ بھی پڑھیں: سائنسدانوں نے 27 کے قریب جنگلی اور آبی حیات کی نئی اقسام دریافت کر لیں
یہ کیفیت کراچی سے جیوانی تک ساحلی علاقوں میں دیکھی جا رہی ہے اور ایران کے ساحلی پانیوں تک بھی پھیل چکی ہے۔
خوراک کی تلاش میں ڈولفن مچھلیوں نے گوادر کے ساحل کا رخ کرلیا
ڈولفن مچھلیوں کاجھنڈکوہ مہدی کے علاقے میں دیکھا گیا pic.twitter.com/WUTf5eVa6J— Asif Kareem Khetran (@AsifKareemTweet) December 28, 2025
اس سمندری بلوم کے نتیجے میں متعدد علاقوں، خصوصاً گوادر کے اطراف، سمندری پانی گہرے سبز رنگ میں تبدیل ہو گیا ہے۔
گہرے سبز پانی کے باوجود گوادر کا سمندر آبی حیات سے بھرپور ہے، ڈبلیو ڈبلیو ایف کے مطابق اس قدرتی مظہر نے ماہی گیری کی سرگرمیوں کو متاثر نہیں کیا۔
مقامی ماہی گیر امیر داد خان نے بتایا کہ گزشتہ چند دنوں کے دوران بلوچستان کے ساحل کے ساتھ جھینگوں کے شکار میں نمایاں اضافہ ہوا ہے اور جھینگے معمول سے بڑے سائز کے ہیں، جو سمندری حالات کے مستحکم ہونے کی علامت ہے۔
مزید پڑھیں:صدیوں پرانی سیمابی آلودگی آرکٹک کی جنگلی حیات کے لیے خطرہ بن گئی
بلوچستان کے ڈائریکٹر میرین فشریز احمد ندیم نے بھی گوادر کی مغربی خلیج میں ڈولفنز کی بڑی تعداد دیکھے جانے کی تصدیق کی ہے۔
صورتحال پر تبصرہ کرتے ہوئے ڈبلیو ڈبلیو ایف کے تکنیکی مشیر محمد معظم خان نے وضاحت کی کہ سمندر میں رنگ کی تبدیلی جیسے مظاہر عموماً غیر زہریلے ہوتے ہیں اور اکثر آبی حیات کی پیداوار میں اضافہ کرتے ہیں۔
انہوں نے کہا کہ نوکٹیلوکا بلوم صرف انتہائی صورتوں میں آبی حیات کی اموات کا باعث بنتا ہے۔
مزید پڑھیں:بدصورت ترین سمجھی جانے والی بلوب فش بہترین مچھلی قرار
یہ کیفیت، جسے بلوچی زبان میں مقامی طور پر ’بد آب‘ کہا جاتا ہے، بحیرۂ عرب میں وقفے وقفے سے ظاہر ہوتی رہتی ہے اور موسمِ سرما میں اس کی شدت زیادہ ہوتی ہے۔‘
تاہم انہوں نے زور دے کر کہا کہ ماہی گیری کی سرگرمیاں معمول کے مطابق جاری ہیں اور ماہی گیر بلا تعطل اپنے روزمرہ کام انجام دے رہے ہیں۔
محمد معظم خان کے مطابق گوادر کی مغربی خلیج میں بوٹل نوز ڈولفنز کی موجودگی ایک حوصلہ افزا علامت ہے، جو اس بات کی تصدیق کرتی ہے کہ سمندر کے سبز ہونے کی کیفیت نے علاقے کی سمندری حیاتیاتی تنوع کو منفی طور پر متاثر نہیں کیا۔
