2026 میں پاکستان میں سولر پینلز کی قیمتوں کے رجحانات کو سمجھنے کے لیے یہ دیکھنا ضروری ہے کہ 2025 میں مارکیٹ کس مرحلے پر کھڑی تھی۔ اس عرصے میں سولر پینلز کی قیمتوں میں نمایاں کمی دیکھنے میں آئی، جس کی بنیادی وجوہات عالمی سطح پر چینی مینوفیکچررز کی حد سے زیادہ پیداوار، روپے کی نسبتاً مستحکم صورتحال تھی۔
سال کے آخری ہفتوں میں بھی سولر پینلز کی قیمت قریباً مستحکم رہی کیونکہ سردیوں کے موسم میں مانگ کا کم ہونا تھا۔ مگر سال کے آخری چند دنوں کی بات کی جائے تو سولر پینلز کی قیمتوں میں اضافہ دیکھنے میں آیا ہے۔
سولر پینلز کی قیمتوں میں کتنا اضافہ دیکھنے میں آیا ہے؟ اور 2026 میں اس کا کیا رجحان رہا سکتا ہے؟ آئیے جانتے ہیں۔ اس حوالے سے بات کرتے ہوئے سولر انڈسٹری سے وابستہ محمد گل باز کا کہنا تھا کہ حالیہ دنوں میں سولر پینلز کی قیمتوں میں قریباً 8 سے 11 فیصد تک اضافہ ہو چکا ہے اور آنے والے وقت میں مزید 10 سے 15 فیصد اضافہ متوقع ہے۔ ان کے مطابق چین میں ماڈیولز کی قیمتیں بڑھ رہی ہیں، جس کا براہِ راست اثر پاکستان میں امپورٹ ہونے والے سولر پینلز پر پڑے گا۔ ان کا خیال ہے کہ جو تاجر اس وقت امپورٹ کریں گے، وہ مستقبل میں بہتر منافع حاصل کر سکیں گے۔
مزید پڑھیں: کیا درجہ حرارت میں کمی سولر پینلز کی قیمتیں نیچے لے آئی؟
ان کا مزید کا مزید کہنا تھا کہ 2026 کے شروعات میں پاکستان میں سولر پینلز کی قیمتیں بڑھیں گی۔ ابھی فی واٹ سولر پینل کی قیمت اگر 27 یا 28 روپے ہے۔ تو یہ بڑھ کر 38 یا 39 روپے تک جا سکتی ہیں۔
انجینئر نور بادشاہ نے بتایا کہ 2025 کے آخر، خصوصاً دسمبر کے ریٹس کی بنیاد پر دیکھا جائے تو 2026 میں سولر پینلز کی قیمتوں میں کوئی خاص بڑا اضافہ فی الحال تو ممکن نہیں لگ رہا۔ ان کا کہنا تھا کہ مختلف برانڈز میں قیمتوں کا اضافہ قریباً 3 سے 5 فیصد کے درمیان رہے گا، جو کسی بڑے جھٹکے کے بجائے ایک قدرتی مارکیٹ ایڈجسٹمنٹ کو ظاہر کرتا ہے۔
انجینئر نور بادشاہ کے مطابق عالمی سطح پر صورتحال کو دیکھا جائے تو 2025 میں چین کی کچھ پالیسی تبدیلیوں، جیسے وی اے ٹی ریبیٹ کا خاتمہ اور پیداوار میں جزوی کمی، کی وجہ سے سولر ماڈیولز کی قیمتوں میں قریباً 9 فیصد تک اضافہ ریکارڈ کیا گیا۔ یہ امکان موجود ہے کہ 2026 میں بھی قیمتوں پر ہلکا دباؤ رہے گا۔ تاہم عالمی اوور سپلائی ابھی مکمل طور پر ختم نہیں ہوئی، اس لیے کسی بہت بڑے اضافے کے امکانات کم دکھائی دیتے ہیں۔
پاکستانی مارکیٹ کے تناظر میں یہ بات اہم ہے کہ 2025 کے آخر میں قیمتیں تاریخی طور پر کم سطح پر پہنچ چکی تھیں، حتیٰ کہ کچھ پینلز 18 سے 20 روپے فی واٹ تک بھی دستیاب تھے۔ پھر کچھ معمولی اضافہ ہوا۔ ایسے میں 2026 کے دوران قیمتوں میں یا تو استحکام رہنے یا ہلکے اضافے کا امکان زیادہ ہے، جو عموماً 3 سے 10 فیصد کے درمیان ہو سکتا ہے۔
مزید پڑھیں: سولر پینلز اور انٹرنیٹ مہنگے ہونے کا امکان، ایف بی آر نے آئی ایم ایف کو تجاویز دیدیں
پاکستان سولر ایسوسی ایشن کے سینئر وائس چیئرمین حسنات خان کے مطابق حالیہ دنوں میں سولر پینلز کی قیمتوں میں قریباً 5 فیصد تک اضافہ دیکھنے میں آیا ہے۔ تاہم ان کا کہنا ہے کہ موسم کی تبدیلی کے باعث آنے والے مہینوں میں سولر پینلز کی طلب میں کمی متوقع ہے، جس کی وجہ سے قیمتوں میں کسی بڑے اضافے کا امکان کم ہے اور ریٹس قابو میں رہیں گے۔
ان کے مطابق 2026 کے دوران بھی مارکیٹ میں مجموعی طور پر قیمتوں کے استحکام کا امکان ہے۔ اگرچہ چین میں سولر ماڈیولز کی قیمتوں میں معمولی اضافہ ہوا ہے، لیکن اس کے اثرات محدود رہنے کی توقع ہے۔ اسی لیے مستقبل میں سولر پینلز کی قیمتوں میں قریباً 5 سے 10 فیصد تک ہلکا سا اضافہ ممکن ہے، تاہم کسی غیر معمولی یا شدید مہنگائی کے امکانات نظر نہیں آتے۔
