روس نے امریکا کے ساتھ آخری جوہری اسلحہ کنٹرول معاہدے نیو اسٹارٹ (New START) کی مدت ختم ہونے پر افسوس کا اظہار کرتے ہوئے کہا ہے کہ وہ اب بھی جوہری ہتھیاروں کی حد سے متعلق بات چیت کے لیے تیار ہے۔
یہ بھی پڑھیں:کیا ’نیو اسٹارٹ‘ کے خاتمے سے نئے ایٹمی خطرات بڑھ جائیں گے؟
ماسکو میں کریملن کے ترجمان دمتری پیسکوف نے کہا کہ اگر واشنگٹن تعمیری ردعمل دے تو روس امریکا سے فوری مذاکرات کے لیے تیار ہے۔ رپورٹس کے مطابق گزشتہ 24 گھنٹوں میں ابو ظبی میں دونوں ممالک کے درمیان غیر رسمی رابطے ہوئے، جن میں نیو اسٹارٹ کے بنیادی نکات پر عمل جاری رکھنے پر غور کیا گیا۔
نیو اسٹارٹ معاہدہ امریکا اور روس کے درمیان جوہری میزائلوں، لانچرز اور اسٹریٹجک وار ہیڈز کی تعداد محدود کرتا تھا، تاہم اس کی قانونی مدت ختم ہو چکی ہے۔ امریکی صدر ڈونلڈ ٹرمپ پہلے ہی چین کو شامل کرتے ہوئے نیا اور بہتر معاہدہ کرنے کی خواہش ظاہر کر چکے ہیں، جسے بیجنگ نے مسترد کیا ہے۔
یہ بھی پڑھیں:یوکرین جنگ پر روس امریکا مذاکرات کا پہلا دور ختم، کن معاملات پر گفتگو ہوئی؟
ادھر اقوام متحدہ کے سیکریٹری جنرل انتونیو گوتریس نے خبردار کیا ہے کہ جوہری خطرات کئی دہائیوں میں بلند ترین سطح پر ہیں اور فریقین سے فوری طور پر مذاکرات بحال کرنے کی اپیل کی ہے۔
