انٹرنیشنل کرکٹ کونسل (آئی سی سی) نے آئی سی سی مینز ٹی 20 ورلڈ کپ 2026 کے لیے کمنٹیٹرز کے پینل کا اعلان کر دیا ہے، جس میں دنیا بھر کے نامور سابق کرکٹرز اور معروف آوازیں شامل کی گئی ہیں۔ آئی سی سی کے مطابق اس بار شائقین کو عالمی معیار کی کمنٹری کے ساتھ شاندار براڈکاسٹ تجربہ فراہم کیا جائے گا۔
یہ بھی پڑھیں:’تمہیں گیند کی حالت بھی دیکھنی چاہیے‘، بین اسٹوکس بال لگنے سے زخمی ہوگئے
آئی سی سی کی جانب سے جاری بیان کے مطابق ٹی 20 ورلڈ کپ 2026 کا آغاز 7 فروری سے بھارت اور سری لنکا میں ہوگا، جبکہ فائنل 8 مارچ کو کھیلا جائے گا۔ ٹورنامنٹ میں مجموعی طور پر 55 میچز ہوں گے، جن کی کمنٹری عالمی فیڈ کے ذریعے تمام براڈکاسٹرز تک پہنچائی جائے گی۔
کمنٹری پینل میں روی شاستری، ناصر حسین، ایان اسمتھ اور ایان بشپ جیسے سینئر اور معتبر نام شامل ہیں۔ ان کے علاوہ سابق ٹی 20 ورلڈ کپ فاتح کھلاڑیوں میں ایرون فنچ، دنیش کارتھک، کمار سنگاکارا، سیموئل بدری، رابن اتھپا اور کارلوس بریتھویٹ بھی کمنٹری کے فرائض انجام دیں گے۔
جنوبی افریقہ کے موجودہ کپتان ٹیمبا باووما اور 2014 کے ٹی 20 ورلڈ کپ فاتح اینجلو میتھیوز بھی کمنٹری ٹیم کا حصہ ہوں گے۔ آئی سی سی کے مطابق نشریات میں پری میچ شوز، اننگز وقفے کے پروگرام، پوسٹ میچ تجزیے اور روزانہ کے ہائی لائٹس شامل ہوں گے۔
یہ بھی پڑھیں:پاکستان بھارت میچ پر بحران: آئی سی سی اور پی سی بی کے مابین خفیہ رابطے تیز
آئی سی سی کا کہنا ہے کہ کمنٹیٹرز کی یہ فہرست ٹورنامنٹ کی عالمی نوعیت کی عکاسی کرتی ہے اور اس کا مقصد دنیا بھر کے کرکٹ شائقین کے لیے دیکھنے کے تجربے کو مزید بہتر بنانا ہے۔
