کولمبو میں پاکستان اور بھارت کے درمیان ٹی20 ورلڈ کپ کے اہم مقابلے سے قبل کرکٹ کا جنون اپنے عروج پر پہنچ گیا ہے، اور اب قومی کرکٹ ٹیم اسٹیڈیم پہنچ گئی ہے۔
شہر بھر میں اور خصوصاً اسٹیڈیم کے اطراف پاکستان کے حق میں بھرپور عوامی حمایت واضح طور پر دیکھی جا رہی ہے، اور شائقین کا جوش و خروش دیدنی ہے۔
یہ بھی پڑھیں: پریماداسا اسٹیڈیم میں پاکستان نے اب تک کتنے ٹی20 میچز کھیلے اور نتائج کیا رہے؟
پریماداسا اسٹیڈیم کے باہر شائقینِ کرکٹ کی بڑی تعداد جمع ہے، جس کے باعث فضا میں غیر معمولی جوش و خروش پایا جاتا ہے۔
ٹورنامنٹ کے سب سے زیادہ منتظر مقابلوں میں شمار ہونے والے اس میچ سے قبل اسٹیڈیم کے اطراف کا علاقہ سبز رنگ میں رنگا ہوا دکھائی دے رہا ہے۔
The R. Premadasa Stadium on the eve of the India-Pakistan clash#T20WorldCup2026 pic.twitter.com/g5XCjc0j5S
— Cricbuzz (@cricbuzz) February 14, 2026
پاکستانی شائقین کے ساتھ ساتھ کئی سری لنکن کرکٹ مداح بھی کھل کر پاکستان کی حمایت کرتے نظر آئے، متعدد مقامی افراد گرین شرٹس پہنے اور پاکستان کے پرچم اٹھائے اسٹیڈیم کے گردونواح میں موجود تھے۔
اسٹیڈیم کے اطراف کی سڑکیں فین زون کا منظر پیش کر رہی ہیں جہاں نعرے، جھنڈے اور ٹیموں کے رنگ ماحول پر غالب ہیں۔
شہری ماحول
اسٹیڈیم کے باہر دونوں ممالک کے شائقین کو ایک ساتھ خوشیاں مناتے دیکھا گیا، جہاں پاکستان اور سری لنکا کے پرچم ساتھ ساتھ لہرا رہے تھے۔
مداحوں کا کہنا تھا کہ پاک بھارت مقابلہ محض ایک میچ نہیں بلکہ عالمی کرکٹ کا سب سے بڑا مقابلہ اور ایک عالمی اسپورٹس ایونٹ ہے، جس کی گونج دونوں ممالک سے کہیں آگے تک سنائی دیتی ہے۔
مزید پڑھیں: ٹی 20 ورلڈ کپ: پاک بھارت میچ کی تمام سیٹیں بُک، ٹکٹ بلیک میں 4 گنا قیمت پر فروخت
یہ جوش و خروش صرف اسٹیڈیم تک محدود نہیں بلکہ کولمبو کے ہوٹلوں، ریسٹورنٹس اور مارکیٹوں میں بھی غیر معمولی رش دیکھنے میں آ رہا ہے۔
مختلف ممالک سے تعلق رکھنے والے شائقین خصوصی طور پر اس ہائی پروفائل مقابلے کو دیکھنے کے لیے شہر پہنچ چکے ہیں، جس سے شہر کا ماحول ایک اسپورٹس فیسٹیول میں تبدیل ہو گیا ہے۔
شائقین کی بھرپور حمایت
اہم تجارتی علاقوں کے دکانداروں کے مطابق ٹیموں کی شرٹس، پرچموں اور کرکٹ سے متعلق اشیا کی فروخت میں نمایاں اضافہ ہوا ہے، جن میں سبز جرسیوں کی طلب سب سے زیادہ ہے۔
کئی سری لنکن شائقین کو بھی پاکستان کے پرچم اٹھائے معروف بازاروں میں گھومتے دیکھا گیا، جو کھیل کے ذریعے سرحدوں سے بالاتر جذبے کی عکاسی کرتا ہے۔
مزید پڑھیں: پاک بھارت ٹی 20 میچ: ہاتھ ملائیں گے یا نہیں، دونوں کپتان کیا کہتے ہیں؟
مقامی مبصرین کے مطابق جب بین الاقوامی کرکٹ مختلف ممالک کے شائقین کو ایک شہر میں اکٹھا کرتی ہے تو یہ موقع محض کھیل تک محدود نہیں رہتا بلکہ دوستی، ہم آہنگی اور مثبت اسپورٹس کلچر کا پیغام بھی دیتا ہے۔
واضح رہے کہ پاکستان اور بھارت آج کولمبو میں ٹی20 ورلڈ کپ کے اہم میچ میں مدِمقابل ہوں گے، دونوں ٹیمیں اپنے ابتدائی دونوں میچ جیت چکی ہیں، جس کے باعث اس ٹاکرے کی اہمیت اور بھی بڑھ گئی ہے۔
