مسلم لیگ ن آزاد کشمیر کی سیاسی کمیٹی کا اجلاس وفاقی وزیر امور کشمیر انجینئر امیر مقام اور رانا ثنا اللہ کی صدارت میں مکمل ہوا، جس میں پارٹی رہنماؤں نے میڈیا میں پارٹی پالیسی کے خلاف کسی بھی بیان بازی پر مکمل پابندی عائد کرنے کا فیصلہ کیا۔
یہ بھی پڑھیں:آزاد کشمیر میں ن لیگ کے اختلافات، اجلاس طلب
اجلاس میں صدر ن لیگ آزاد کشمیر شاہ غلام قادر اور پارلیمانی لیڈر راجہ فاروق حیدر خان نے شرکت کی، جبکہ مشتاق منہاس، نجیب نقی، چوہدری طارق فاروق اور بیرسٹر افتخار گیلانی بھی موجود تھے۔ وفاقی وزیر کے کوآرڈینیٹر سردار طارق نے بھی اجلاس میں حصہ لیا۔ اجلاس کے دوران مقبوضہ کشمیر کی آزادی اور شہداء کے ایصال ثواب کے لیے فاتحہ خوانی بھی کی گئی۔
ذرائع کے مطابق اجلاس میں یہ فیصلہ کیا گیا کہ پارٹی کے تمام اراکین میڈیا میں پارٹی کی پالیسی کے خلاف کوئی بیان نہ دیں اور تمام بیانات پارٹی کے موقف کے مطابق جاری کیے جائیں۔ یہ پابندی پارٹی یکجہتی اور سیاسی حکمت عملی کو مضبوط بنانے کے لیے نافذ کی گئی ہے۔ اجلاس میں جماعتی پلیٹ فارم پر تمام معاملات حل کرنے پر بھی اتفاق کیا گیا۔
