بنگلہ دیش پولیس کے انسپکٹر جنرل بہارالعالم نے فیلڈ پولیس افسران کو ہدایت دی ہے کہ وہ بھتہ خوری، ڈاکہ زنی اور منشیات سے متعلق جرائم کے خلاف سخت اقدامات کریں۔
انہوں نے زور دیا کہ ملک میں عام قانون و نظم و نسق کو کسی بھی قیمت پر برقرار رکھا جانا چاہیے۔
ملک کے پولیس چیف نے کہا کہ بھتہ خوری، دہشت گردی یا منشیات کے جرائم میں ملوث کسی بھی شخص کے خلاف قانونی کارروائی کی جائے گی، چاہے اس کا سیاسی یا سماجی پس منظر کچھ بھی ہو۔
یہ بھی پڑھیں: بنگلہ دیش ایئرلائنز کے چیئرمین عہدے سے فارغ، وجہ کیا بنی؟
یہ ہدایات اتوار کی دوپہر پولیس ہیڈکوارٹرز سے ایک ورچوئل میٹنگ کے دوران جاری کی گئیں، جس میں یونٹ چیفس، میٹروپولیٹن پولیس کمشنرز، رینج ڈی آئی جیز اور ضلع پولیس سپرنٹنڈنٹس نے شرکت کی۔
پولیس چیف نے خبردار کیا کہ ممنوعہ سیاسی تنظیموں کی کوئی سرگرمی برداشت نہیں کی جائے گی۔
ان کے مطابق، کسی بھی قسم کے انتشار پھیلانے کی کوشش کو قانون کے مطابق سختی سے روکا جائے گا۔
مزید پڑھیں: بنگلہ دیش کی نئی حکومت کا صحافتی آزادی کے تحفظ کا عزم
علاوہ ازیں، آئی جی بنگلہ دیش پولیس نے ہائی وے پولیس کو ہائی وے پر ڈاکے کی وارداتیں روکنے کے لیے سخت اقدامات کرنے کی ہدایت دی۔
انہوں نے اعلان کیا کہ ہائی وے ڈکیتی کسی بھی قیمت پر روکی جائے گی، اس ضمن میں ضلع پولیس کو بھی تعاون کرنے کی ہدایت دی گئی۔
