دہشت گردوں کی جانب سے بلوچستان کے ضلع کیچ میں پاکستان ایران سرحد پر واقع سیکیورٹی فورسز کی پوسٹ کو نشانہ بنایا گیا ہے۔ پوسٹ پر تعینات مستعد جوانوں نے بہادری کے ساتھ دستایب اسلحہ سے جواب دیتے ہوئے دہشت گردوں کو پسپائی پر مجبور کردیا۔
آئی ایس پی آر کے مطابق سخت فائرنگ کے اس تبادلے میں دو بہادر فوجی؛ سپاہی حسنین اشتیاق اور سپاہی عنایت اللہ، دہشت گردوں کا جوانمردی سے مقابلہ کرتے ہوئے شہید ہوگئے۔
34 سالہ سپاہی حسنین اشتیاق ضلع ڈیرہ غازی خان کے جب کہ 27 سالہ سپاہی عنایت اللہ ضلع جھل مگسی کے رہائشی تھے۔
سیکیورٹی فورسز نے ایرانی حکام سے رابطہ کرتے ہوئے مذکورہ علاقے میں فوراً آپریشن شروع کردیا تاکہ دہشت گردوں کو فرار ہونے کا موقع نہ مل سکے۔
آئی ایس پی آر کے مطابق سیکیورٹی فورسز قوم کے ہمراہ امن اور استحکام کو سبوتاژ کرنے کی ہرکوشش کو ناکام بنانے کے لیے پر عزم ہے۔
