امریکی وزیر خارجہ مارکو روبیو نے واضح کیا ہے کہ ایران کو کسی بھی صورت جوہری ہتھیار حاصل کرنے کی اجازت نہیں دی جائے گی، جبکہ مشرق وسطیٰ سے امریکی شہریوں کے انخلا کی کارروائیاں بدستور جاری ہیں۔
میڈیا سے گفتگو میں مارکو روبیو نے بتایا کہ جنگ کے آغاز کے بعد اب تک تقریباً 9 ہزار امریکی شہری خطے سے نکل چکے ہیں۔
ان کا کہنا تھا کہ فضائی حدود کی بندش کے باعث انخلا کے عمل میں بعض مشکلات پیش آ رہی ہیں، تاہم مشرق وسطیٰ میں موجود امریکی شہریوں کو ہدایت کی گئی ہے کہ وہ قریبی امریکی سفارتخانوں سے رابطے میں رہیں۔
انہوں نے مزید کہاکہ امریکی سفارتی تنصیبات براہ راست حملوں کی زد میں ہیں۔ دبئی میں امریکی قونصل خانے سے ملحقہ پارکنگ ایریا میں بھی ڈرون حملہ رپورٹ ہوا ہے۔
مارکو روبیو نے اس عزم کا اعادہ کیاکہ امریکہ اپنے مقاصد کے حصول تک کارروائیاں جاری رکھے گا۔
