بلوچستان کے ضلع واشک کے علاقے بسیمہ کے شہر پٹک میں سیکیورٹی فورسز نے کارروائی کرتے ہوئے فتنہ الہندوستان سے تعلق رکھنے والے 3 دہشتگردوں کو ہلاک اور 7 کو زخمی کر دیا۔ کارروائی اس وقت کی گئی جب دہشتگردوں کی جانب سے علاقے میں ناکہ قائم کرنے کی اطلاع موصول ہوئی۔
ذرائع کے مطابق اطلاع ملنے پر سیکیورٹی فورسز کی ٹیمیں فوری طور پر علاقے میں روانہ کی گئیں جہاں فتنہ الہندوستان کے دہشتگردوں کے ساتھ شدید فائرنگ کا تبادلہ ہوا۔ مقابلے کے دوران 3 دہشتگرد مارے گئے جبکہ سات زخمی ہو گئے۔
سیکیورٹی فورسز کی جانب سے علاقے میں سرچ آپریشن بھی جاری ہے تاکہ ممکنہ طور پر فرار ہونے والے عناصر کو گرفتار کیا جا سکے اور علاقے میں امن و امان کی صورتحال برقرار رکھی جا سکے۔
