’میں رشتہ بچانے کے لیے خاموش رہی‘، رجب بٹ کے طلاق نوٹس پر ایمان فاطمہ بول اٹھیں

معروف یوٹیوبر رجب بٹ نے اپنی اہلیہ ایمان کو طلاق کا قانونی نوٹس بھجوا دیا ہے جس کی تصویر ایمان فاطمہ نے اپنے انسٹاگرام اکاؤنٹ پر شیئر کر دی ہے۔ نوٹس سامنے آنے کے بعد سوشل میڈیا پر اس معاملے نے نئی بحث چھیڑ دی ہے۔

ایمان فاطمہ نے قانونی نوٹس کی تصویر شیئر کرتے ہوئے لکھا کہ میں اس رشتے کو بچانے کے لیے خاموش رہی لیکن پہلے پوڈکاسٹ میں لگائے گئے جھوٹے الزامات، اور اب یہ قانونی نوٹس بھیج دیا گیا ہے۔

اپنے پیغام میں انہوں نے سوال اٹھاتے ہوئے کہا کہ میں صرف یہ پوچھنا چاہتی ہوں کہ اس سب میں میری اور میرے بیٹے کی کیا غلطی ہے؟ میرے پاس کہنے کو بہت کچھ ہے لیکن اس مقدس مہینے کے احترام میں میں اب بھی خاموشی اختیار کیے ہوئے ہوں۔

حال ہی میں ایک پوڈکاسٹ میں گفتگو کرتے ہوئے رجب بٹ نے کہا تھا کہ وہ اب اس شادی کو ختم کرنے کا فیصلہ کر چکے ہیں اور اس رشتے کو بچانے کی مزید کوشش نہیں کریں گے کیونکہ وہ منافقت پر مبنی دوستی اور رشتے نہیں چلانا چاہتے۔

یہ بھی پڑھیں: بہت برداشت کیا مگر اب سچ سامنے لاؤں گا، رجب بٹ کے سالے عون شیخ کی وارننگ

انہوں نے کہا کہ ان کے لیے ان کا بیٹا کیوان بہت اہم ہے اور وہ ہمیشہ اس سے محبت کریں گے کوئی انہیں بیٹے سے ملنے سے نہیں روک سکتا۔ انہوں نے مزید کہا کہ وہ ایک سال پرانی شادی کو اپنے 30 سال پرانے والدین پر ترجیح نہیں دے سکتے، اسی لیے انہوں نے اس رشتے کو ختم کرنے کا فیصلہ کیا ہے

واضح رہے کہ رجب بٹ نے 2024ء میں ایمان فاطمہ سے شادی کی تھی جس کی تقریبات کی ویڈیوز اور تصاویر سوشل میڈیا پر خوب وائرل ہوئی تھیں اور مداحوں نے اس جوڑے کو کافی سراہا تھا۔