انٹرنیشنل کرکٹ کونسل (آئی سی سی) نے پاکستان کے بلے باز سلمان علی آغا کے خلاف کارروائی کرتے ہوئے انہیں ایک ڈی میرٹ پوائنٹ دے دیا۔
آئی سی سی کی وضاحت
آئی سی سی کے مطابق سلمان علی آغا کوڈ آف کنڈکٹ کے لیول ون کی خلاف ورزی کے مرتکب پائے گئے۔
مزید پڑھیں: پاک بنگلہ دیش سیریز: سلمان آغا کا متنازع رن آؤٹ، اسپورٹس مین اسپرٹ کی بحث چھڑ گئی
بیان کے مطابق سلمان آغا نے بنگلہ دیش کے خلاف میچ کے دوران آرٹیکل 2.2 کی خلاف ورزی کی، جو بین الاقوامی کرکٹ کے دوران سامان، لباس یا گراؤنڈ کے آلات کے ساتھ نامناسب رویے سے متعلق ہے۔
آئی سی سی نے سلمان علی آغا کے ریکارڈ میں ایک ڈی میرٹ پوائنٹ شامل کر دیا اور بتایا کہ کرکٹر نے اپنی غلطی کا اعتراف کر لیا ہے۔
واضح رہے کہ گزشتہ روز ڈھاکہ کے شیر بنگلا کرکٹ اسٹیڈیم میں کھیلے گئے میچ میں بنگلہ دیش کے کپتان مہدی حسن میراز نے سلمان علی آغا کو نان اسٹرائیکر اینڈ پر رن آؤٹ کیا، جس پر آغا نے میدان چھوڑتے ہوئے شدید غصے کا اظہار کیا تھا۔
مزید پڑھیں: کرکٹ کی تاریخ کا انوکھا رن آؤٹ، بنگلہ دیش کے خلاف سلمان علی آغا مایوس ہوکر پویلین لوٹے
سابق پاکستانی کرکٹرز رمیز راجا اور حمد حفیظ نے بھی مہدی حسن کے اس اقدام کو اسپورٹس مین اسپرٹ کے منافی قرار دیا، جبکہ سوشل میڈیا پر مہدی حسن کو اس حرکت پر شدید تنقید کا سامنا کرنا پڑا۔
