پاکستان میں فیشن کے رجحانات ہر سال بالخصوص عید کے موقع پر نمایاں طور پر تبدیل ہوتے رہتے ہیں جب معروف ڈیزائنرز اور فیشن برانڈز نئے انداز متعارف کراتے ہیں۔ گزشتہ سال مختصر قمیص کے ساتھ فرشی شلوار کا ٹرینڈ بے حد مقبول رہا تھا۔ اس ٹرینڈ کو ڈیزائنرز، فیشن برانڈز، شوبز شخصیات اور ملک بھر کی خواتین نے بھرپور انداز میں اپنایا تھا۔
بعد ازاں یہ رجحان سرحد پار بھارت تک بھی پہنچ گیا جہاں متعدد بھارتی انفلوئنسرز اور اداکارائیں بھی اس طرز کے لباس میں نظر آئیں۔
یہ بھی پڑھیں: فرشی شلوار بھی ملتانی کڑھائی والے سوٹ کو مات نہ دے سکی
تاہم رواں سال اس ٹرینڈ میں نمایاں تبدیلی دیکھنے میں آ رہی ہے اور فرشی شلوار کی جگہ اب ’فرشی شرٹس‘ کا انداز متعارف کرایا جا رہا ہے۔ اگرچہ لمبی قمیصں گزشتہ تقریباً ایک دہائی سے فیشن کا حصہ رہی ہے لیکن اس مرتبہ ڈیزائنرز نے ان کی لمبائی مزید بڑھا کر انہیں پاؤں تک لمبا کر دیا ہے جسے اب فرشی شرٹس کا نام دیا جا رہا ہے۔
معروف فیشن ڈیزائنر کرن افضال نے اس نئے رجحان کی تصدیق کرتے ہوئے کہا کہ گزشتہ سال فرشی شلوار کا ٹرینڈ تھا جبکہ اس سال فرشی شرٹس فیشن میں شامل ہو رہی ہیں جو پاؤں تک لمبی ہوتی ہیں۔
یہ بھی پڑھیں: فرشی شلوار کا بخار: یہ پہناوا کس کے لیے موزوں، ماریہ بی نے بتادیا
ان کے مطابق اس وقت خواتین فل لینتھ شرٹس کو پلازو اور شلوار کے ساتھ پہننے کو ترجیح دے رہی ہیں۔ تاہم انہوں نے کہا کہ ابھی ہر طبقہ اس رجحان کو مکمل طور پر نہیں اپنا سکا لیکن فیشن ڈیزائنرز اس سیزن میں فرشی شرٹس کے ملبوسات تیار کرنے میں مصروف ہیں۔
قیمتوں میں اضافے کے حوالے سے گفتگو کرتے ہوئے انہوں نے کہا کہ ٹیکسوں میں اضافے کے باعث ملبوسات کی قیمتیں بھی بڑھ گئی ہیں جس کا اثر فیشن انڈسٹری اور خریداروں دونوں پر پڑ رہا ہے۔
