سینیٹ سیکریٹریٹ نے چیئرمین سینیٹ سید یوسف رضا گیلانی کے لیے لینڈ کروزر گاڑی کی خریداری سے متعلق میڈیا رپورٹس کو گمراہ کن قرار دیتے ہوئے مسترد کردیا۔
سینیٹ سیکریٹریٹ کے ترجمان نے بتایا کہ زیرِ بحث لینڈ کروزر مئی 2025 میں مالی سال 25-2024 کے دوران شفاف عمل کے تحت گاڑیوں کی تبدیلی کے منصوبے کا حصہ تھی۔ اس منصوبے میں چیئرمین قائمہ کمیٹیوں، ڈپٹی چیئرمین سینیٹ، قائدِ ایوان اور قائدِ حزب اختلاف کے لیے بھی گاڑیاں شامل تھیں۔
ترجمان کے مطابق لینڈ کروزر کی ادائیگی مئی 2025 میں گزشتہ مالی سال کے بجٹ سے کی گئی تھی جبکہ چیئرمین سینیٹ کے لیے خریدی گئی گاڑی کی ڈیلیوری مارچ 2026 میں موصول ہوئی۔
سینیٹ سیکریٹریٹ نے اس موقع پر واضح کیاکہ گاڑی کی خریداری سے متعلق پھیلائی جانے والی قیاس آرائیاں بے بنیاد ہیں۔
سیکریٹریٹ نے میڈیا سے بھی درخواست کی کہ ریاستی اداروں سے متعلق خبریں شائع کرتے وقت ذمہ داری اور مکمل تحقیق کو یقینی بنائیں۔
