پاکستان سپر لیگ (پی ایس ایل) کی فرنچائز لاہور قلندرز کے کپتان شاہین آفریدی نے کہا ہے کہ ٹیم کی اصل کامیابی صرف ٹرافی جیتنے میں نہیں بلکہ نئے کھلاڑیوں کی تربیت اور انہیں مواقع فراہم کرنے میں بھی چھپی ہے۔
اسلام آباد میں جاری لاہور قلندرز کے کنڈیشنگ کیمپ کے دوران بات کرتے ہوئے شاہین آفریدی نے بتایا کہ ہر سیزن سے قبل کیمپ کا انعقاد اس لیے کیا جاتا ہے تاکہ کھلاڑی ایک دوسرے کو بہتر سمجھیں اور ٹیم کے ماحول کے ساتھ ہم آہنگ ہو جائیں۔
انہوں نے مزید کہاکہ گزشتہ 4 سے 5 سال ٹیم کے لیے انتہائی کامیاب رہے ہیں، خاص طور پر پلیئر ڈیولپمنٹ پروگرام کے ذریعے نئے ٹیلنٹ کو سامنے لانے میں۔
قومی فاسٹ بولر کے مطابق ملک بھر میں ٹرائلز کے ذریعے باصلاحیت کھلاڑی منتخب کیے گئے، انہیں مواقع فراہم کیے گئے، اور بعض کھلاڑی قومی سطح تک پہنچنے میں کامیاب ہوئے، جو ٹیم کے لیے ایک بڑی کامیابی ہے۔
شاہین آفریدی نے امید ظاہر کی کہ رواں سال بھی ٹرائلز کے ذریعے نئے نوجوان کھلاڑی سامنے آئے ہیں، اور ایک یا دو باصلاحیت نوجوان پی ایس ایل میں جگہ بنانے میں کامیاب ہو سکتے ہیں۔ انہوں نے کہاکہ آئندہ برسوں کے لیے بھی مضبوط کھلاڑی تیار کیے جا رہے ہیں۔
کپتان نے اس عزم کا اظہار کیاکہ نئے مقامی اور غیر ملکی کھلاڑیوں کے شامل ہونے اور نئے گراؤنڈز پر میچز کے انعقاد سے شائقین کرکٹ کو مزید دلچسپ مقابلے دیکھنے کو ملیں گے۔
