اسلام آباد پولیس نے چاند رات اور عیدالفطر کے موقع پر خصوصی ٹریفک پلان تشکیل دے دیا۔
ترجمان اسلام آباد پولیس کے مطابق اسلام آباد ٹریفک پولیس نے چاند رات اور عیدالفطر کے موقع پر شہر میں خصوصی ٹریفک پلان تشکیل دے دیا ہے۔
انہوں نے بتایا کہ زیادہ رش والی شاہراہوں، اہم تجارتی مراکز اور تفریحی مقامات پر 520 ٹریفک افسران تعینات کیے جائیں گے تاکہ شہریوں کی رہنمائی اور ٹریفک کے بہاؤ کو منظم کیا جا سکے۔
شہریوں کی سہولت کے لیے مارکیٹوں میں خصوصی ہیلپ ڈیسک بھی قائم کی جائیں گی، جبکہ طلباء کیولئرز بھی مختلف مقامات پر موجود رہ کر شہریوں کی رہنمائی اور ٹریفک قوانین پر عملدرآمد کو یقینی بنائیں گے۔
ترجمان کے مطابق چاند رات اور عید کے ایام میں عوامی مقامات اور شاہراہوں پر ون ویلنگ اور ہلڑ بازی میں ملوث ڈرائیورز کے خلاف بلا تفریق کریک ڈاؤن کیا جائے گا۔
چیف ٹریفک آفیسر کیپٹن (ر) حمزہ ہمایوں تمام انتظامات کی ذاتی نگرانی کریں گے۔ شہریوں سے درخواست کی گئی ہے کہ وہ مارکیٹوں میں پارکنگ ایریاز میں گاڑیاں پارک کریں اور ٹریفک افسران کے ساتھ تعاون کریں۔
اسلام آباد ٹریفک پولیس شہریوں کو مارکیٹوں میں بھرپور سہولیات فراہم کرنے کے لیے ہر ممکن اقدامات کررہی ہے۔
