یومِ پاکستان کے موقع پر پاکستان میں جاپان کے سفیر اَکاماتسو شوئیچی نے قیادت اور عوام کو دلی مبارکباد پیش کرتے ہوئے دونوں ممالک کے درمیان دوستی اور تعاون کو مزید فروغ دینے کے عزم کا اعادہ کیا ہے۔
یہ بھی پڑھیں:یومِ پاکستان: سندھ حکومت کا 23 مارچ کو عام تعطیل کا اعلان
جاپان کے سفیر اَکاماتسو شوئیچی نے اپنے ویڈیو پیغام میں یومِ پاکستان کے تاریخی موقع پر پاکستانی قوم کو مبارکباد دیتے ہوئے نیک خواہشات کا اظہار کیا۔ انہوں نے کہا کہ اس اہم دن پر وہ پاکستان کی قیادت اور عوام کو دل کی گہرائیوں سے مبارکباد پیش کرتے ہیں۔
سفیر نے کہا کہ یہ دن اس عزم کی تجدید کا موقع ہے کہ ہم مل کر ایک مضبوط اور خوشحال پاکستان کے لیے کام جاری رکھیں۔ انہوں نے اس بات کا اعادہ کیا کہ جاپان پاکستان کی ترقی اور خوشحالی کے سفر میں ہمیشہ اس کے ساتھ کھڑا رہے گا۔
اپنے پیغام کے اختتام پر انہوں نے پاک جاپان دوستی کو سراہتے ہوئے کہا کہ یہ تعلقات وقت کے ساتھ مزید مستحکم ہوں گے، اور دونوں ممالک کے درمیان تعاون کا سلسلہ جاری رہے گا۔
