پاکستان کرکٹ بورڈ (پی سی بی) نے ایچ بی ایل پی ایس ایل کے 11ویں ایڈیشن کا نظرثانی شدہ شیڈول جاری کر دیا ہے، جس کے تحت ٹورنامنٹ اب صرف دو شہروں لاہور اور کراچی میں کھیلا جائے گا اور مجموعی طور پر 44 میچز 39 دن میں مکمل ہوں گے۔
لاہور میں جاری کردہ اعلامیے کے مطابق حکومت پاکستان کے ساتھ مشاورت اور قومی کفایت شعاری اقدامات کے تحت ایچ بی ایل پی ایس ایل 11 کے لیے میزبان شہروں کی تعداد کم کر کے چھ سے دو کر دی گئی ہے، اور تمام میچز اب صرف لاہور اور کراچی میں منعقد ہوں گے۔
Revised Schedule for HBL PSL 11 🏏
44 matches will be taking place in a space of 39 days with Lahore and Karachi each hosting 22 matches.
Read More: https://t.co/hgnFSKUQPD#HBLPSL11 | #NewEra pic.twitter.com/1Vz4WiHOMn
— PakistanSuperLeague (@thePSLt20) March 22, 2026
پی سی بی کے مطابق اپڈیٹڈ شیڈول میں 44 میچز 39 دنوں میں کھیلے جائیں گے، جن میں لاہور اور کراچی 22، 22 میچز کی میزبانی کریں گے۔ ٹورنامنٹ کا افتتاحی میچ حیدرآباد کنگسمینز اور لاہور قلندرز کے درمیان شیڈول کے مطابق برقرار ہے۔
اعلامیے کے مطابق لاہور میں ایلیمینیٹر 1، ایلیمینیٹر 2 اور فائنل جبکہ کراچی میں کوالیفائر میچ کھیلا جائے گا۔ پی ایس ایل 11 کا آغاز 26 مارچ سے ہوگا اور یہ 3 مئی تک جاری رہے گا۔
پی سی بی نے کہا ہے کہ ٹورنامنٹ کو عارضی طور پر ’واچ فرام ہوم‘ ماڈل پر منتقل کیا جا رہا ہے، جس کے تحت براڈکاسٹ اور پروڈکشن کے معیار کو مزید بہتر بنایا جائے گا تاکہ شائقین کو عالمی معیار کا دیکھنے کا تجربہ فراہم کیا جا سکے۔
اعلامیے میں مزید کہا گیا کہ محدود وینیوز کا فیصلہ قومی وسائل پر دباؤ کم کرنے اور توانائی کے بہتر استعمال کے لیے کیا گیا ہے، کیونکہ اندازہ تھا کہ روزانہ ہزاروں شائقین کی آمد و رفت سے اضافی بوجھ پڑتا۔
پی سی بی نے کہا کہ اگرچہ اس فیصلے کے باعث اسٹیڈیمز میں شائقین کی کمی محسوس ہوگی، تاہم ٹورنامنٹ اپنی شاندار روایت اور اعلیٰ معیار کو برقرار رکھتے ہوئے جاری رہے گا۔
