پاکستان ریلوے کی تیزگام ایکسپریس لودھراں کے قریب حادثے کا شکار ہو گئی، جس کے نتیجے میں متعدد بوگیاں پٹڑی سے اتر گئیں، اور کئی مسافر زخمی ہوگئے ہیں۔
میڈیا رپورٹس کے مطابق حادثہ اس وقت پیش آیا جب ٹرین کے ڈبوں کو آپس میں جوڑنے والا ہک اچانک ٹوٹ گیا، جس کے باعث ٹرین دو حصوں میں تقسیم ہو گئی۔ انجن کے ساتھ جڑی ابتدائی بوگیاں آگے بڑھ گئیں جبکہ پیچھے موجود ڈبے پٹڑی سے اتر کر الٹ گئے۔
حادثے کے فوراً بعد مسافروں میں خوف و ہراس پھیل گیا اور چیخ و پکار مچ گئی، جبکہ مقامی افراد نے بروقت مدد فراہم کرتے ہوئے پھنسے ہوئے مسافروں کو نکالنے میں حصہ لیا۔
اطلاع ملنے پر ریسکیو 1122 اور پولیس کی ٹیمیں موقع پر پہنچ گئیں اور امدادی کارروائیاں شروع کر دیں۔
ابتدائی رپورٹس کے مطابق حادثہ انجن کے بعد چوتھی بوگی کے قریب پیش آیا، اور زخمی ہونے والے مسافروں کو اسپتال منتقل کردیا گیا ہے جہاں انہیں طبی امداد دی جارہی ہے۔
حادثے کے باعث متاثرہ ریلوے ٹریک پر ٹرینوں کی آمد و رفت معطل ہو گئی ہے جبکہ حکام کے مطابق بحالی کا کام جلد شروع کیا جائے گا اور واقعے کی وجوہات کا تعین تحقیقات کے بعد کیا جائے گا۔
