وزیراعظم آفس وزیراعظم شہباز شریف سے عالمی ڈیجیٹل آپریٹر ویون (VEON) گروپ کے چیف ایگزیکٹو آفیسر نے وفد کے ہمراہ ملاقات کی، جس میں پاکستان میں ڈیجیٹل معیشت، سرمایہ کاری اور ٹیلی کام شعبے کی ترقی پر تبادلہ خیال کیا گیا۔
مزید پڑھیں: 5 جی اسپیکٹرم کی نیلامی، تیز رفتار موبائل انٹرنیٹ کی دستیابی میں کتنا موثر ثابت ہوگا؟
وزیراعظم نے وفد کو خوش آمدید کہتے ہوئے کہا کہ حکومت ڈیجیٹل آپریٹرز انڈسٹری میں سرمایہ کاروں کو ہر ممکن سہولت فراہم کرنے کے لیے پرعزم ہے۔ انہوں نے کہا کہ پاکستان میں حالیہ 5 جی اسپیکٹرم کی کامیاب نیلامی اس شعبے میں جدت اور ترقی کی جانب مثبت پیشرفت کا واضح ثبوت ہے۔
وزیراعظم محمد شہباز شریف سے عالمی ڈیجیٹل آپریٹر VEON گروپ کے چیف ایگزیکٹو افیسر کان ترزی اوعلو کی وفد کے ہمراہ ملاقات
حکومت ملک میں ڈیجیٹل آپریٹرز انڈسٹری میں سرمایہ کاروں کو ہر ممکن سہولت فراہم کرنے کے لیے پرعزم ہے۔ وزیراعظم@KulAalam @AmirSaeedAbbasi pic.twitter.com/B8VTOrPNCD— Media Talk (@mediatalk922) April 1, 2026
وزیراعظم کا کہنا تھا کہ پاکستان انفارمیشن ٹیکنالوجی کے شعبے میں جدت کو فروغ دینے اور بین الاقوامی سرمایہ کاری بڑھانے کے لیے جامع حکمت عملی کے تحت کام کر رہا ہے، جبکہ متعلقہ ادارے ٹیلی کام آپریٹرز کے ساتھ مل کر عوام کو معیاری انٹرنیٹ سہولیات فراہم کرنے کے لیے ہم آہنگی سے کام کر رہے ہیں۔
انہوں نے مزید کہا کہ کیش لیس معیشت کا قیام حکومت کی اہم ترجیحات میں شامل ہے اور اس مقصد کے لیے انفارمیشن ٹیکنالوجی کا مؤثر استعمال یقینی بنایا جا رہا ہے۔ وزیراعظم نے اس بات پر زور دیا کہ پاکستان کی نوجوان آبادی ڈیجیٹل پلیٹ فارمز کے ذریعے معیشت کی ترقی میں کلیدی کردار ادا کر سکتی ہے، جو بین الاقوامی سرمایہ کاروں کے لیے بھی خاصی کشش رکھتی ہے۔
مزید پڑھیں: 5G اسپیکٹرم نیلامی کی پالیسی کا از سر نو جائزہ لینے کا فیصلہ
اس موقع پر وفد نے حکومت کے ڈیجیٹلائزیشن اقدامات اور کیش لیس اکانومی کے فروغ کی کوششوں کو سراہا اور پاکستان میں مزید سرمایہ کاری بڑھانے کے عزم کا اظہار کیا۔
