ماری انرجیز نے وزیرستان بلاک میں تیل اور گیس کے وافر ذخائر کی دریافت سے متعلق پاکستان اسٹاک ایکسچینج کو باضابطہ طور پر آگاہ کر دیا ہے۔
کمپنی کی جانب سے جاری خط کے مطابق ‘اسپن وام ون’ کنوئیں کی کھدائی جدید ‘ای ڈبلیو ٹی’ سسٹم کے ذریعے مکمل کی گئی۔ کنوئیں سے یومیہ 40 ایم ایم ایس سی ایف ڈی گیس اور 200 بیرل ہلکے تیل کے ذخائر حاصل ہوئے ہیں۔
یہ بھی پڑھیے: گیس کی الاٹمنٹ اورقیمتوں کی تفصیلات پر ماری انرجیز کا اسٹاک ایکسچیبج کو خط
خط میں مزید بتایا گیا ہے کہ ‘اسپن وام’ کنوئیں کی پیداوار کو ‘شیوا’ کنوئیں کے ساتھ منسلک کر کے مجموعی ذخائر کو سسٹم میں شامل کیا جا رہا ہے۔ دونوں کنوؤں سے گیس کی مجموعی پیداوار بڑھ کر 100 ایم ایم ایس سی ایف ڈی تک پہنچ گئی ہے۔
اسی طرح دونوں کنوؤں سے حاصل ہونے والے ذخائر کو یکجا کرنے کے بعد تیل کی یومیہ پیداوار تقریباً 800 بیرل تک پہنچ گئی ہے۔
کمپنی کے مطابق وزیرستان بلاک میں تیل و گیس کی یہ دریافت مشترکہ شراکت دار کمپنیوں کے ساتھ مل کر کی گئی ہے، جو ملکی توانائی کے شعبے میں اہم پیش رفت قرار دی جا رہی ہے۔
