اسلام آباد سیف سٹی منصوبے کو کیپٹل سمارٹ سٹی میں تبدیل کرنے کا فیصلہ کیا گیا ہے۔ وفاقی وزیر داخلہ محسن نقوی نے سیف سٹی ہیڈکوارٹر اسلام آباد کا دورہ کیا اور اس حوالے سے خصوصی اجلاس کی صدارت کی۔
اجلاس میں اسلام آباد سیف سٹی کے فیز ٹو پر پیش رفت کا تفصیلی جائزہ لیا گیا۔ اجلاس کے دوران فیصلہ کیا گیا کہ فیز ٹو پر جاری تمام کام 30 مئی تک مکمل کر لیے جائیں گے۔
یہ بھی پڑھیے: ڈیرہ اسماعیل خان میں سیف سٹی منصوبہ، جدید کیمروں کی تنصیب کا آغاز
وزیر داخلہ محسن نقوی نے منصوبے کی مقررہ مدت میں تکمیل کو ہر صورت یقینی بنانے کی ہدایت کرتے ہوئے کہا کہ اسلام آباد میں سنٹرل کمانڈ اینڈ کنٹرول سسٹم کو اپگریڈ کیا جائے گا۔ ان کے مطابق پولیسنگ، ٹریفک مینجمنٹ اور شہری سہولیات کے نظام کو ایک مربوط نظام کے تحت انٹیگریٹ کیا جائے گا۔
انہوں نے کہا کہ کیپٹل سمارٹ سٹی میں ٹریفک مینجمنٹ سے لے کر کرائم کنٹرول تک جدید ٹیکنالوجی پر مبنی نظام نافذ کیا جائے گا، جبکہ اسلام آباد کو محفوظ شہر بنانے کے لیے تمام دستیاب وسائل بروئے کار لائے جا رہے ہیں۔
اجلاس میں سیف سٹی ہیڈکوارٹر کے نئے ڈیزائن کی بھی منظوری دی گئی۔ اس موقع پر آئی جی اسلام آباد پولیس علی ناصر رضوی نے وزیر داخلہ کو منصوبے پر تفصیلی بریفنگ دی۔
یہ بھی پڑھیے: پنجاب سیف سٹی ایپ کے نئے فیچر پر بحث اور تشویش، اصل وجہ کیا ہے؟
بریفنگ میں بتایا گیا کہ فیز ٹو کا 75 فیصد کام مکمل ہو چکا ہے، شہریوں کے تحفظ کے لیے جدید کیمروں اور مانیٹرنگ سسٹم کی تنصیب جاری ہے۔ اب تک 152 کلومیٹر طویل فائبر آپٹک کیبل بچھائی جا چکی ہے۔
مزید بتایا گیا کہ فیز ٹو کے کام کو 20 مئی تک مکمل کر کے ٹیسٹنگ کا عمل شروع کیا جائے گا۔
اجلاس میں وفاقی سیکرٹری داخلہ خرم آغا، ڈی جی ایف آئی اے ڈاکٹر عثمان انور، آئی جی اسلام آباد پولیس علی ناصر رضوی، ڈی جی سیف سٹی ہارون جوئیہ سمیت دیگر اعلیٰ حکام نے شرکت کی۔
