پنجاب اسمبلی کے اجلاس میں اپوزیشن نے ناجائز چالانوں، سی سی ڈی اور سیاسی انتقام کے خلاف حکومت پر تنقید کی ہے۔
اپوزیشن رکن رانا آفتاب احمد نے ناجائز چالانوں کا معاملہ اٹھاتے ہوئے کہاکہ میرے 4 چالان ہو گئے ہیں، متعلقہ محکمہ کہتا ہے کہ چالان پر ریویو کیا جائے گا، اگر غلط ہوئے تو ختم کر دیے جائیں گے۔
مزید پڑھیں: پاکستان تحریک انصاف کی پنجاب اسمبلی اجلاسوں میں غیر حاضری کی وجہ کیا ہے؟
انہوں نے کہاکہ جب انصاف نہیں ملے گا تو کیا ایوان میں بات بھی نہیں کریں گے۔
رانا آفتاب احمد نے کہاکہ وہ ڈی سی او اور ڈی پی او کے محتاج نہیں ہیں۔ انہوں نے یہ بھی سوال اٹھایا کہ سی سی ڈی کیوں بنانی پڑی۔
سی سی ڈی سے متعلق مؤقف
ڈپٹی اسپیکر ظہیر اقبال چنڑ نے کہاکہ سی سی ڈی کا پورے صوبے کو فائدہ ہوا ہے۔
حکومتی رکن صہیب بھرتھ نے کہاکہ اداروں کو سب نے مل کر مضبوط کرنا ہے۔
حکومتی رکن رانا محمد اقبال نے بددیانتی کوئی بھی کرے اس کے خلاف کارروائی عمل میں لائی جائےگی۔
ڈپٹی اسپیکر نے کہاکہ اگر 25-2024 کے مقدمات میں ریکوری نہیں ہوئی تو پولیس اہلکاروں کو نوٹس دینا چاہیے۔
اپوزیشن لیڈر کی لا اینڈ آرڈر پر گفتگو
اپوزیشن لیڈر معین ریاض قریشی نے ایوان میں گفتگو کرتے ہوئے کہاکہ آج کا سیشن اپوزیشن کی ریکوزیشن پر بلایا گیا ہے۔
انہوں نے کہاکہ شام 6 بجے کے بعد اب لا اینڈ آرڈر پر بحث شروع کی جا رہی ہے۔ اپوزیشن ایوان میں اس لیے آتی ہے تاکہ عوامی مسائل پر حکومت سے جواب طلب کیا جا سکے۔
انہوں نے کہاکہ تمام سیاسی جماعتوں کو اکٹھے بیٹھ کر مشاورت کرنی چاہیے کیونکہ آنے والے دنوں میں معاشی ابتری کا خدشہ ہے۔
انہوں نے کہا کہ اگر اندرونی طور پر مضبوط ہوں گے تو سرحدوں پر بھی مضبوط ہوں گے۔
سیاسی رہنماؤں کے حوالے سے تحفظات
اپوزیشن لیڈر نے کہاکہ عالیہ حمزہ کے گھر پر چھاپے کے دوران چادر و چار دیواری کا تقدس پامال کیا گیا۔
انہوں نے کہاکہ میاں اسلم کو حلف اٹھانے نہیں دیا گیا اور وہ اپنی والدہ کی وفات پر بھی موجود نہیں ہو سکے۔
انہوں نے سوال اٹھایا کہ کیا ایسی جمہوریت پروان چڑھائی جا رہی ہے۔
انہوں نے کہا کہ اعجاز چوہدری کو ہر دس دن بعد گردوں کا ٹیسٹ کروانا ہوتا ہے۔
انہوں نے مطالبہ کیا کہ عالیہ حمزہ، اسلم اقبال، چوہدری اعجاز اور کلیم اللہ سمیت دیگر رہنماؤں کے پروڈکشن آرڈر جاری کیے جائیں۔
