قبائلی ضلع باجوڑ کے سرحدی علاقے کٹکوٹ کے گاؤں ملک شاہین میں افغان طالبان کی جانب سے بلااشتعال گولہ باری کے نتیجے میں 3 افراد شہید جبکہ 3 شدید زخمی ہوگئے۔
شہدا میں ایک خاتون اور دو بچے شامل ہیں، جو ایک ہی گھر کے مکین تھے، زخمیوں کو فوری طور پر قریبی اسپتال منتقل کردیا گیا ہے۔
ذرائع کا کہنا ہے کہ افغان طالبان گزشتہ چند روز سے شدت پسند تنظیم فتنہ الخوارج کے ایک گروہ کو پاکستان میں دراندازی کرانے کی کوشش کر رہے تھے۔
یہ بھی پڑھیں: باجوڑ خودکش حملے میں افغان بمبارملوث، دہشتگردی کے لیے افغان سرزمین استعمال ہو رہی ہے، سیکیورٹی ذرائع
تاہم پاک فوج کی بروقت کارروائی کے باعث یہ کوشش ناکام بنا دی گئی، سیکیورٹی ذرائع کے مطابق اسی ناکامی کے بعد افغان طالبان نے مایوسی میں شہری آبادی کو نشانہ بنایا۔
واقعے کے فوری بعد پاک فوج نے مؤثر جوابی کارروائی کرتے ہوئے افغانستان کی جانب سے فائرنگ کرنے والی گن پوزیشن کو مکمل طور پر تباہ کردیا۔
سیکیورٹی ذرائع کے مطابق باجوڑ سے ملحق افغان سرحدی چوکیوں کو بھی نشانہ بنایا جا رہا ہے، جس کے نتیجے میں افغان طالبان کو بھاری جانی نقصان پہنچنے کی اطلاعات ہیں۔
مزید پڑھیں: باجوڑ میں سرحد پار دراندازی کی بڑی کوشش ناکام، 14 خوارج ہلاک
مقامی آبادی نے اس واقعے کی شدید مذمت کرتے ہوئے سکیورٹی فورسز کے ساتھ مکمل یکجہتی کا اظہار کیا ہے۔
سیکیورٹی ذرائع کے مطابق افواجِ پاکستان شہریوں کے جان و مال کے تحفظ اور علاقے میں دیرپا امن کے قیام کے لیے ہر وقت مستعد ہیں۔
ذرائع کا مزید کہنا ہے کہ افغان طالبان کی جانب سے شہری آبادی کو نشانہ بنانا ان کے مذموم عزائم اور بوکھلاہٹ کا واضح ثبوت ہے۔
