دنیا کی مقبول ترین ویڈیو شیئرنگ پلیٹ فارم یوٹیوب نے صارفین کے لیے ایک نیا فیچر متعارف کرایا ہے جس کے تحت اب شارٹس ویڈیوز کو مکمل طور پر بند کیا جا سکتا ہے۔ یہ سہولت اسکرین ٹائم سے متعلق بڑھتے ہوئے خدشات کے پیشِ نظر پیش کی گئی ہے۔
نئے فیچر کے مطابق صارفین سیٹنگز میں جا کر شارٹس دیکھنے کے دورانیے کو صفر منٹ پر سیٹ کر سکتے ہیں۔ اس اقدام کے بعد نہ صرف شارٹس فیڈ غیر فعال ہو جاتی ہے بلکہ آٹو پلے، ویڈیو تجاویز اور اسکرولنگ بھی ختم ہو جاتی ہے۔
یہ بھی پڑھیں: پنجاب حکومت اپنے یو ٹیوب چینل سے بیانیے کی جنگ جیت پائے گی؟
یوٹیوب کے مطابق یہ فیچر اس کے پہلے سے موجود ’ٹائم مینجمنٹ‘ ٹولز کا توسیعی حصہ ہے جس کے ذریعے صارفین پہلے 15 منٹ سے لے کر دو گھنٹے تک کی حد مقرر کر سکتے تھے۔ اب صفر منٹ کا آپشن شامل کیے جانے سے صارفین کو مکمل کنٹرول حاصل ہو گیا ہے۔
فیچر کے فعال ہونے پر شارٹس ٹیب ویڈیوز دکھانے کے بجائے ایک پیغام ظاہر کرتا ہے کہ صارف اپنی مقررہ حد تک پہنچ چکا ہے۔ بعض صورتوں میں شارٹس مواد ہوم فیڈ سے بھی غائب ہو جاتا ہے جس سے اس کی رسائی نمایاں طور پر کم ہو جاتی ہے۔
یہ بھی پڑھیں: کیبل سروس بند، صارفین کو یوٹیوب ٹی وی پر منتقل کرنے کا فیصلہ، کن صارفین کو ملے گی خصوصی رعایت؟
ماہرین کے مطابق مختصر ویڈیوز کا رجحان جسے ٹک ٹاک نے مقبول بنایا، تیزی سے فروغ پا رہا ہے اور روزانہ اربوں ویوز حاصل کر رہا ہے۔ تاہم اس کے ساتھ صارفین کی توجہ میں کمی اور غیر ضروری وقت کے ضیاع جیسے مسائل بھی سامنے آ رہے ہیں۔
یوٹیوب نے ابتدا میں اس فیچر کو والدین کے کنٹرول کے طور پر متعارف کرایا تھا تاکہ کم عمر صارفین کے استعمال کو محدود کیا جا سکے تاہم اب اسے تمام صارفین کے لیے دستیاب کیا جا رہا ہے۔
یہ بھی پڑھیں: ٹک ٹاک اور یوٹیوب کریئیٹرز کو ماہانہ 3 ہزار ڈالر دینے کا اعلان
یہ پیش رفت ایسے وقت میں سامنے آئی ہے جب ڈیجیٹل پلیٹ فارمز صارفین کو مصروف رکھنے کے ساتھ ساتھ انہیں اپنی آن لائن سرگرمیوں پر کنٹرول دینے کی کوششوں کو بھی اہمیت دے رہے ہیں۔
