پشاور زلمی کے کپتان بابراعظم نے بھارتی اسٹار ویرات کوہلی کا ایک بڑا عالمی ریکارڈ برابر کردیا ہے۔ بابر اعظم اب ویرات کوہلی کے ہمراہ ٹی 20 کرکٹ میں سب سے زیادہ 47 مرتبہ ‘سنچری پارٹنرشپ’ کا حصہ رہنے والے کھلاڑی بن گئے ہیں۔
اس فہرست میں کرس گیل 46 اور ڈیوڈ وارنر 45 ایسی شراکت داریوں کے ساتھ بالترتیب تیسرے اور چوتھے نمبر پر ہیں۔
یہ بھی پڑھیں: بابراعظم کی شاندار فارم، پی ایس ایل کے سی ای او نے نظرِ بد سے بچانے کے لیے منفرد انداز اپنا لیا
کراچی کے نیشنل بینک اسٹیڈیم میں کھیلے گئے پی ایس ایل کے 29ویں میچ میں پشاور زلمی نے ریکارڈز کے انبار لگا دیے۔ کپتان بابر اعظم کی ناقابلِ شکست سنچری کی بدولت زلمی نے کوئٹہ گلیڈی ایٹرز کے خلاف 255 رنز کا پہاڑ جیسا مجموعہ کھڑا کیا، جو اس اسٹیڈیم کی تاریخ کا بلند ترین اسکور ہے۔
اس سے قبل پشاور زلمی نے اسی سیزن میں کراچی کنگز کے خلاف 246 رنز بنائے تھے، تاہم آج کے اسکور نے زلمی کے اپنے پچھلے تمام ریکارڈز کو پیچھے چھوڑتے ہوئے اسے لیگ کی تاریخ کا تیسرا بڑا مجموعہ بنا دیا ہے۔
یہ بھی پڑھیں: بابراعظم نے ٹی20 انٹرنیشنل میں ایک اور سنگ میل عبور کرلیا، ویرات کوہلی کو پیچھے چھوڑ دیا
اس اننگز کی سب سے اہم خاصیت بابر اعظم اور کوشال مینڈس کے درمیان ہونے والی 135 رنز کی شراکت داری تھی، جس کے ساتھ ہی بابر اعظم نے محض 52 گیندوں پر اپنے پی ایس ایل کیریئر کی تیز ترین سنچری مکمل کی، جس میں 6 چوکے اور 4 چھکے شامل تھے۔
اس سنگ میل کے ساتھ انہوں نے لیگ میں سب سے زیادہ سنچریاں بنانے کا کامران اکمل، رائیلی روسو اور عثمان خان کا ریکارڈ بھی برابر کردیا ہے۔
یہ بھی پڑھیں: بابراعظم اور محمد رضوان کے ون ڈے ریکارڈز پر کھلاڑیوں کا شاندار جشن، ویڈیو وائرل
مجموعی طور پر ٹی20 کرکٹ میں یہ بابراعظم کی 12ویں سنچری ہے، جس کے بعد وہ سب سے زیادہ سنچریاں بنانے والے کھلاڑیوں کی فہرست میں دوسرے نمبر پر آگئے ہیں، جہاں ویسٹ انڈیز کے کرس گیل 22 سنچریوں کے ساتھ پہلے نمبر پر براجمان ہیں۔
