اقوام متحدہ کے ادارہ برائے مہاجرت یعنی آئی او ایم نے انکشاف کیا ہے کہ سال 2025 کے دوران دنیا بھر میں ہجرت کے راستوں پر تقریباً 7,900 افراد ہلاک یا لاپتا ہو گئے۔
جس کے بعد 2014 سے اب تک مرنے یا لاپتا ہونے والوں کی مجموعی تعداد 80 ہزار سے تجاوز کر گئی ہے۔
ادارے کے مطابق 2025 میں عالمی سطح پر ہجرت کے راستوں پر 7,904 اموات اور گمشدگیاں ریکارڈ کی گئیں۔
یہ بھی پڑھیں: یورپ جانے کا جنون، بحیرہ روم میں ایک اور کشتی الٹنے سے 44 پاکستانیوں سمیت 50 افراد ہلاک
انٹرنیشنل آرگنائزیشن فار مائیگریشن کے ’مسنگ مائیگرنٹس پروجیکٹ‘ کے مطابق 2014 سے اب تک 80 ہزار سے زائد افراد ہجرت کے دوران جان کی بازی ہار چکے یا لاپتا ہو چکے ہیں۔
رپورٹ میں کہا گیا ہے کہ یہ اعداد و شمار دراصل اصل تعداد کا کم از کم تخمینہ ہیں، تاہم یہ اس امر کی نشاندہی کرتے ہیں کہ مہاجرین کی اموات روکنے اور متاثرہ خاندانوں کی مدد کے لیے فوری اقدامات ناگزیر ہیں۔
اگرچہ 2025 کے اعداد و شمار 2024 کے مقابلے میں کم ہیں، جب 9,200 اموات ریکارڈ کی گئیں جو اب تک کی بلند ترین سالانہ تعداد تھی، تاہم آئی او ایم کے مطابق یہ صورتحال اس عالمی ناکامی کا تسلسل ہے جس میں ان قابلِ تدارک اموات کو روکنے میں پیش رفت نہیں ہو سکی۔
7,900 people died, disappeared on migration routes in 2025: UN https://t.co/L0FVj9aGgB
— The Straits Times (@straits_times) April 21, 2026
ادارے نے مزید کہا کہ 2025 میں امداد میں غیر معمولی کمی اور خطرناک غیر قانونی راستوں سے متعلق معلومات کی محدود دستیابی نے صورتحال کو مزید پیچیدہ بنا دیا ہے، جس کے باعث لاپتا ہونے والے مہاجرین مزید گمنام ہو رہے ہیں۔
امریکا میں پالیسی تبدیلیوں کے اثرات
امریکا میں امیگریشن پالیسیوں میں تبدیلی اور جنوبی سرحد کی بندش کے باعث وسطی امریکا سے شمال کی جانب ہجرت میں نمایاں کمی آئی ہے۔
آئی او ایم کی عہدیدار ماریا موئٹا کے مطابق اس کے نتیجے میں اس راستے پر اموات میں کمی دیکھی گئی، تاہم امریکا اور میکسیکو سے ڈیٹا کی کمی اور فنڈنگ میں کٹوتیوں نے مکمل تصویر واضح ہونے سے روکے رکھا۔
یورپ اور دیگر خطوں کی صورتحال
یورپ میں مجموعی طور پر آمد میں کمی آئی، لیکن مہاجرین کے رجحانات میں تبدیلی دیکھی گئی، جہاں بنگلہ دیشی شہری سب سے بڑی تعداد میں پہنچنے والے گروہ بن گئے جبکہ شامی مہاجرین کی تعداد میں کمی آئی۔
یورپ جانے والے سمندری راستوں پر تقریباً 3,400 اموات اور گمشدگیاں ریکارڈ ہوئیں، جن میں سے 1,330 اموات وسطی بحیرہ روم کے راستے پر ہوئیں۔
مزید پڑھیں: یمن کے ساحل کے قریب کشتی الٹنے سے 54 افریقی پناہ گزین ہلاک، درجنوں لاپتا
جبکہ 1,200 سے زائد افراد مغربی افریقہ سے اسپین کے کینری جزائر جانے والے بحرِ اوقیانوس کے راستے میں ہلاک یا لاپتا ہوئے۔
اسی طرح خلیج بنگال اور بحیرہ انڈمان میں تقریباً 900 اموات ریکارڈ کی گئیں، یہ راستہ زیادہ تر روہنگیا مہاجرین استعمال کرتے ہیں اور 2025 اس روٹ کے لیے اب تک کا مہلک ترین سال قرار دیا گیا۔
خطرات بدستور موجود
آئی او ایم کی سربراہ ایمی پوپ کا کہنا ہے کہ تنازعات، موسمیاتی دباؤ اور پالیسی تبدیلیوں کے باعث ہجرت کے راستے بدل رہے ہیں، مگر خطرات بدستور شدید ہیں۔
انہوں نے کہا کہ ان اعداد و شمار کے پیچھے ایسے انسان ہیں جو خطرناک سفر پر مجبور ہوتے ہیں، اور ایسے خاندان ہیں جو اپنے پیاروں کی خبر کے منتظر رہتے ہیں جو شاید کبھی نہ ملے۔
مزید پڑھیں: لیبیا کشتی حادثہ: انسانی اسمگلنگ میں ملوث ایجنٹ گرفتار
ادارے کے مطابق 2014 سے اب تک کم از کم 3 لاکھ 40 ہزار خاندان ایسے ہیں جو اپنے لاپتا رشتہ داروں کے باعث نفسیاتی، سماجی، قانونی اور معاشی مسائل کا سامنا کر رہے ہیں۔
آئی او ایم نے عالمی برادری پر زور دیا کہ وہ سیاسی عزم کا مظاہرہ کرے تاکہ مہاجرین کی جانیں بچائی جا سکیں اور متاثرہ خاندانوں کی مدد ممکن ہو سکے۔
