بھارتی شہر اندور میں پولیس اہلکاروں کی جانب سے ایک تاجر کے گھر میں مبینہ زبردستی داخل ہو کر سونا چوری کرنے کا واقعہ سامنے آیا ہے، جس پر سخت کارروائی کرتے ہوئے 5 اہلکاروں کو معطل کر دیا گیا ہے۔ واقعے نے پولیس کے طرزِ عمل پر سنگین سوالات کھڑے کر دیے ہیں۔
تفصیلات کے مطابق بھارت کے شہر اندور میں ایک تاجر کے گھر میں مبینہ طور پر زبردستی داخل ہو کر سونے کے زیورات چوری کرنے کے الزام میں 5 پولیس اہلکاروں کو معطل کر دیا گیا ہے۔
یہ بھی پڑھیے اعلیٰ سپرمارکیٹس سے چوری کی منصوبہ بندی کرنے والا گروہ گرفتار، 6 خواتین بھی شامل
حکام کے مطابق یہ واقعہ یکم اپریل کی رات پیش آیا، جس کے بعد متاثرہ شخص کی جانب سے باضابطہ شکایت درج کرائی گئی۔ شکایت موصول ہونے پر محکمانہ تحقیقات کا آغاز کر دیا گیا ہے۔
زون ٹو کے ڈپٹی کمشنر پولیس کمار پراتیک نے بتایا کہ 5 سے 6 اہلکار شکایت کنندہ کے گھر پہنچے، دروازہ توڑ کر اندر داخل ہوئے اور اہلِ خانہ کے ساتھ بدسلوکی کی۔ انہوں نے کہا کہ شکایت ملنے کے بعد تمام 5 اہلکاروں کو فوری طور پر معطل کر دیا گیا ہے۔
رپورٹس کے مطابق سادہ لباس میں ملبوس پولیس اہلکاروں نے مبینہ طور پر تاجر گورو جین کے گھر کے باہر نصب سی سی ٹی وی کیمرے بھی بند کیے اور چیک باؤنس کیس کے بہانے گھر میں داخل ہوئے۔ بعد ازاں اندرونی کیمروں کی فوٹیج میں انہیں گھر کے اندر دیکھا گیا۔
یہ بھی پڑھیے 25 کروڑ روپے مالیت کی چوری کا مقدمہ، 2 ہزار کی برآمدگی: عدالت نے گھریلو ملازمہ کو بری کر دیا
شکایت کنندہ کا مؤقف ہے کہ اس دوران تقریباً 20 سے 22 تولہ سونا چوری کیا گیا۔ حکام کے مطابق یہ اہلکار دراصل ایک چیک باؤنس کیس میں وارنٹ کی تعمیل کے لیے گئے تھے، جس میں گورو جین اور ریٹائرڈ اے سی پی راکیش گپتا کے درمیان مالی تنازع بھی زیرِ بحث ہے۔
ایک اور واقعہ
ادھر ایک علیحدہ واقعے میں اندور ہی میں موٹر سائیکل پارکنگ کے تنازع پر 35 سالہ شخص کو مبینہ طور پر چاقو کے وار سے قتل کر دیا گیا۔ پولیس کے مطابق مقتول سریندر ساہو اپنے 8 سالہ بیٹے کے ساتھ شادی کی تقریب میں شرکت کے لیے آیا تھا کہ یہ واقعہ پیش آیا۔
یہ واقعہ ہیرا نگر تھانے کی حدود میں واقع گوری نگر علاقے میں پیش آیا، جہاں عینی شاہدین کے بیانات قلمبند کیے جا رہے ہیں اور مزید تحقیقات جاری ہیں۔
