اقوام متحدہ کے ترقیاتی پروگرام (یو این ڈی پی) نے اپنی تازہ ترین رپورٹ میں خبردار کیا ہے کہ مشرقِ وسطیٰ میں ایران اور امریکا، اسرائیل حالیہ تنازع بھارت کی معیشت پر گہرے اثرات مرتب کرسکتا ہے، جس کے نتیجے میں تقریباً 25 لاکھ مزید بھارتی شہری غربت کی دلدل میں دھنس سکتے ہیں۔
یہ بھی پڑھیں: اگنی ویر اسکیم نے بھارتی معیشت اور فوجی نظام کی کمزوریاں عیاں کر دیں
رپورٹ کے مطابق توانائی اور اشیائے خورونوش کی قیمتوں میں اضافے سے گھریلو آمدنی اور سرکاری خزانے پر شدید دباؤ بڑھے گا۔ ’مشرقِ وسطیٰ میں فوجی کشیدگی، ایشیا بحرالکاہل پر انسانی ترقی کے اثرات‘ کے عنوان سے جاری اس رپورٹ میں کہا گیا ہے کہ اس بحران کی وجہ سے عالمی سطح پر 88 لاکھ افراد خط غربت سے نیچے جاسکتے ہیں، جس میں جنوبی ایشیا کا حصہ سب سے زیادہ ہوگا۔
بھارت میں غربت کی شرح 23.9 فیصد سے بڑھ کر 24.2 فیصد تک پہنچنے کا خدشہ ہے، جس سے غریب افراد کی مجموعی تعداد 354 ملین ہوجائے گی۔ بھارت اپنی پیٹرولیم ضروریات کا 90 فیصد سے زائد درآمد کرتا ہے، جبکہ خام تیل کا 40 فیصد اور ایل پی جی کا 90 فیصد حصہ مشرقِ وسطیٰ سے آتا ہے، آبنائے ہرمز میں کسی بھی قسم کی رکاوٹ سپلائی چین کو متاثر کر کے ادویات کی قیمتوں میں 10 سے 15 فیصد اور طبی آلات کے خام مال کی قیمتوں میں 50 فیصد تک اضافے کا سبب بن سکتی ہے۔
یہ بھی پڑھیں: ’ہاں، بھارتی معیشت مردہ ہے‘، راہول گاندھی نے امریکی صدر ٹرمپ کے بیان کی حمایت کردی
رپورٹ میں اس بات کا بھی تذکرہ کیا گیا ہے کہ اس ممکنہ تباہی کو روکنے کے لیے پاکستان نے سفارتی محاذ پر اپنی کوششیں تیز کردی ہیں۔ پاکستان کی درخواست پر امریکا اور ایران کے درمیان 8 اپریل کو 14 روزہ جنگ بندی کا معاہدہ ہوا تھا، جس کے بعد 11 اپریل کو اسلام آباد میں دونوں ممالک کے نمائندوں کے درمیان تاریخی براہِ راست مذاکرات ہوئے۔
دوسری جانب وزیراعظم پاکستان شہباز شریف نے اس عزم کا اعادہ کیا ہے کہ پاکستان ایران،امریکا تنازع کے مستقل حل کے لیے اپنی مخلصانہ کوششیں جاری رکھے گا، اسلام آباد میں مذاکرات کے دوسرے دور کی تیاریاں کی جارہی ہیں تاکہ جنگ بندی کو مستقل امن معاہدے میں تبدیل کیا جاسکے اور خطے کو مزید معاشی تباہی سے بچایا جاسکے۔
یہ بھی پڑھیں: امریکا میں اڈانی گروپ کیخلاف فردجرم، بھارتی معیشت پر سرمایہ کاروں کا اعتماد مجروح ہورہا ہے؟
امریکی صدر ڈونلڈ ٹرمپ نے بھی اپنے بیان میں کہا ہے کہ ایران سے امن مذاکرات کے دوسرے دور کے حوالے سے اچھی خبر جمعے تک آسکتی ہے۔
