اسلام آباد میں غیرملکی وفود کی آمد کے پیش نظر 23 اپریل بروز جمعرات کو بھی ریڈ زون میں واقع سرکاری دفاتر کے لیے ورک فرام ہوم کا اعلان کر دیا گیا۔
کابینہ ڈویژن کی جانب سے جاری کردہ نوٹیفکیشن کے مطابق ریڈ زون میں موجود تمام وزارتوں، ڈویژنز اور دیگر وفاقی اداروں میں 23 اپریل کو دفاتر کی بجائے گھر سے کام کیا جائے گا۔
نوٹیفکیشن میں تمام افسران اور عملے کو ہدایت کی گئی ہے کہ وہ اپنے اسٹیشن پر موجود رہیں اور ضرورت پڑنے پر فوری طور پر دفتر طلب کیے جانے کے لیے تیار رہیں۔
اس میں مزید کہا گیا ہے کہ سرکاری امور کی انجام دہی کے لیے خصوصی انتظامات مکمل کر لیے گئے ہیں۔
دوسری جانب وفاقی آئینی عدالت نے ریڈ زون کی بندش کے باعث 23 اپریل بروز جمعرات کو بھی عدالت بند رکھنے کا فیصلہ کیا ہے۔
ایڈیشنل رجسٹرار کے مطابق ریڈ زون کی بندش کے باعث عدالت کی کارروائی معطل رکھنے کا فیصلہ کیا گیا ہے۔
اس حوالے سے جاری نوٹیفکیشن میں کہا گیا ہے کہ وفاقی آئینی عدالت کی مقررہ کاز لسٹ بھی منسوخ کردی گئی ہے۔
نوٹیفکیشن کے مطابق وفاقی آئینی عدالت کی تمام برانچ رجسٹریاں معمول کے مطابق کھلی رہیں گی اور اپنے روزمرہ امور انجام دیتی رہیں گی۔
عدالتی انتظامیہ کے مطابق یہ فیصلہ وکلا اور سائلین کو درپیش ممکنہ مشکلات کے پیش نظر کیا گیا ہے۔
واضح رہے کہ امریکا اور ایران کے درمیان اسلام آباد میں مذاکرات ہونے جا رہے ہیں، جس کے پیش نظر سیکیورٹی کے سخت انتظامات کیے گئے ہیں۔
